०९ साउन २०८३, शनिबार
सिन्धुलीको गोलञ्जोर गाउँपालिकाले जेनजी प्रदर्शनका क्रममा शहीद भएका योगेन्द्र न्यौपाने 'रोशन'को सम्मानमा अन्तरपालिका भलिबल प्रतियोगिता आयोजना गरेको छ ।
उक्त पालिकाको वडा नम्बर १ च्याकुटारबेँसी खेल मैदानमा आयोजित प्रतियोगिताको पालिका प्रमुख शङ्करराज बराल र ज्वालाप्रसाद न्यौपानेले निर्णायक (रेफ्री)लाई बल हस्तान्तरण गरी संयुक्त रूपमा उद्घाटन गरेका हुन् ।
देशमा व्याप्त भ्रष्टाचार र बेथितिविरुद्ध तथा सुशासन प्रवर्द्धनको आवाजका साथ जेनजी प्रदर्शनमा सहभागी भएका रोशनको गत भदौ २३ गते नयाँ बानेश्वरमा गोली लागेर घटनास्थलमै निधन भएको थियो । रोशन च्याकुटारबेँसीका बासिन्दा थिए ।
प्रतियोगितामा कमलामाई र दूधौली नगरपालिकाका एक/एक तथा गोलञ्जोर, फिक्कल, तीनपाटन र सुनकोसी गाउँपालिकाका दुई/दुई गरी १० टोलीको सहभागिता रहेको गोलन्जोरका उपाध्यक्ष न्यौपानेले जानकारी दिए ।
प्रतियोगितामा प्रथम, द्वितीय र तृतीय हुने टिमलाई क्रमशः ७५ हजार, ५० हजार र ३५ हजार नगदसहित प्रमाणपत्र प्रदान गरिनेछ ।
‘स्वास्थ्यका लागि खेलकुद : राष्ट्रका लागि खेलकुद’ भन्ने नारा दिइएको उक्त प्रतियोगिता तीन दिनसम्म सञ्चालन हुनेछ ।
प्रतियोगिता उद्घाटन कार्यक्रममा उनका पिता युवराज न्यौपाने (उमेश) र परिवारका सदस्य उपस्थित थिए ।
