०५ साउन २०८३, मंगलबार
कम्पनी रजिष्ट्रारको कार्यालयले दिने सेवालाई अटोमेसन अर्थात् स्वचालित प्रणालीमा लगिएको छ ।
यसअघि नै पूर्ण रूपमा अनलाइन प्रणालीमा गए पनि सेवाग्राहीले कार्यालयमै धाउनुपर्ने बाध्यता थियो । अब भने उक्त बाध्यता कम्पनी रजिष्ट्रारको कार्यालयले हटाइसकेको जनाएको छ ।
तिहार र छठपछि सेवाग्राहीले कार्यालयमै नआउनुपर्ने गरी स्वचालित प्रणालीबाट सेवा दिन थालिएको कार्यालयका उपरजिष्ट्रार तथा सूचना अधिकारी सूर्य प्रसाद चापागाईंले जानकारी दिए ।
पहिलेदेखि अनलाइनबाट सेवा दिइरहेको भए पनि कार्यालयमा सेवाग्राही आउनुपर्ने बाध्यता रहेको उनको भनाइ छ । जुन अहिले करिब करिब समाप्त भइसकेको छ ।
‘कार्यालयमा देखिरहने भिडभाड तिहार र छठपछि देखिने छैन । कार्यालयले दिने सेवालाई अटोमेसनमा लगिसकेका छौं’, उनले भने, ‘अनलाइनबाट दिने सेवाको पनि ६० प्रतिशत अटोमेसनमा गइसकेको छ । त्यसबाहेकको काम त अनलाइनबाट भइरहेकै छ । अहिले तिहारअघि मात्रै केही सेवाग्राही आइरहेको देखिन्छ । जुन छठपछि देखिन्छ । सेवाग्राहीले यहाँ आउनै पर्दैन ।’
कार्यालयले दिने सेवालाई ६० प्रतिशत अटोमेसन अर्थात् स्वचालित प्रणालीमा लगिएको छ । यसअघि नै कार्यालयले अनलाइनमार्फत् सेवा दिँदै आइरहेको थियो । अनलाइन सेवा दिँदै आइरहेको भए पनि सीमित कामका लागि कार्यालय आउनुपर्ने बाध्यता रहेको कार्यालयको दाबी छ ।
कम्पनीले हरेक वर्ष गर्ने कम्पनी अद्यावधिक अर्थात् कम्पनीको दर्ता प्रमाण पत्रको काम पूर्ण रूपमा अटोमेसनबाटै हुने बनाइएको छ । कार्यालयका अनुसार अब अनलाइनबाटै आवेदन दिएर अनलाइनबाटै प्रमाणपत्र पाउने सकिनेछ ।
कार्यालयमा करिब ५० प्रतिशतभन्दा बढी सेवाग्राही कम्पनी अद्यावधिकका लागि आउने गरेका थिए । जुन अब पूर्ण रूपमा स्वचालित प्रणालीबाटै हुने भएपछि मानिसहरूको चाप यत्तिकै कम हुने जनाइएको छ ।
पूँजी वृद्धिका लागि पनि सेवाग्राहीले अनलाइनबाटै आवेदन दिएर अनलाइनमार्फत् नै राजस्व बुझाएर पूँजी वृद्धिको पत्र प्राप्त गर्न सकिने कार्यालयले जनाएको छ । पूँजी वृद्धिका लागि कम्पनीको वार्षिक साधारणसभाले पारित गरेअनुसार अनलाइनमार्फत् आवश्यक कागजात पेस गरेर स्वचालित प्रणालीमार्फत पूँजी वृद्धिको प्रमाणपत्र प्राप्त गर्न सकिन्छ ।
कम्पनीहरूले गर्नुपर्ने इनिसियल अपडेट पनि अटोमेसनबाटै हुने कार्यालयले बनाइसकेको छ । कम्पनी स्थापना भइसकेपछि रजिस्ट्रारको कार्यालयलाई दिनुपर्ने जानकारी जस्तै; ठेगाना तथा ठेगाना परिवर्तन, सञ्चालकहरूले दिनुपर्ने जानकारी, लेखा परीक्षकको नियुक्ति लगायतका इनिसियल अपडेट अनलाइन प्रणालीबाटै गर्न मिल्ने बनाइएको छ ।
कम्पनी प्रशासन व्यवस्थापन सूचना प्रणाली (क्यामिसमा डिजिटल हस्ताक्षरसहित) स्वचालित रूपमा नै कार्यालयले सेवा दिने व्यवस्था मिलाइएको छ । जसले गर्दा सेवाग्राहीले कार्यालयमा आएर गर्नुपर्ने काम यसै प्रणालीबाटै हुन्छ ।
यसअघि कम्पनी संस्थापन र कम्पनी प्रशासन सम्बन्धी कामको अभिलेख ३ देखि ६ तहसम्मका हुने गर्दथ्यो । जुन अहिले बढीमा २ तहबाट कार्य टुङ्गो लाग्ने प्रबन्ध मिलाइएको छ । यसका साथै कम्पनी दर्ता गर्दा सहायक रजिस्ट्रार तहबाट हुने काम र कम्पनी दर्तापछि सहायक रजिस्ट्रारकै तहबाट टुङ्गो लगाउने वा बढीमा उपरजिष्ट्रारसम्मबाट टुंगो लाग्ने व्यवस्था गरिएको छ । यसले माथिल्लो तहसम्म पुग्नुपर्ने र समय लाग्ने समस्यालाई करिब करिब टुङ्ग्याइदिएको छ ।
२०७६ सालदेखि कम्पनी रजिस्ट्रारको कार्यालयले अनलाइनबाट सेवा दिन शुरू गरेको थियो । २०७६ सालमा कार्यालयले विद्युतीय कार्य प्रणाली प्रारम्भ गर्दै आफ्ना प्रमुख सेवा अनलाइनबाटै हुने बनाएको थियो ।
तर, अनलाइनबाट सम्पूर्ण काम भने गर्न सकिएको थिएन । जुन पछिल्लो २/३ महिनामा गरिएको छ । अहिले करिब ६० प्रतिशत स्वचालित प्रणालीबाट भइरहेको कामले आर्थिक अनियमितता नहुने तथा पारदर्शिता रहने कार्यालयको विश्वास छ ।
