०२ साउन २०८३, शनिबार
पाकिस्तान क्रिकेट बोर्ड (पीसीबी)ले एकदिवसीय टोलीको कप्तान परिवर्तन गरेको छ ।
पीसीबीले विकेटकिपर ब्याट्सम्यान मोहम्मद रिजवानलाई हटाएर तीब्रगतिका बलर साहिन शाह अफरिदीलाई एकदिवसीय टोलीको कप्तान बनाएको हो ।
रावलपिण्डीमा पाकिस्तान र दक्षिण अफ्रिकाबीचको दोस्रो टेस्ट जारी रहँदा पीसीबीले यस्तो निर्णय लिएको समाचारमा जनाइएको छ । पीसीबीले यस्तो निर्णय लिनुको कुनै स्पष्ट कारण भने सार्वजनिक गरेको छैन ।
यो निर्णय इस्लामावादमा चयन समिति र प्रशिक्षक माइक हेसनसँगको छलफलपछि लिएको पीसीबीले जनाएको छ । पछिल्लो केही समययता एकदिवसीय टोलीका कप्तान मोहम्मद रिजवानमाथि निरन्तर प्रश्न उठाइँदै आएको थियो ।
रिजवानलाई गत वर्ष एकदिवसीय टोलीको कप्तान बनाइएको थियो । उनकै कप्तानीमा पाकिस्तानले सन् २०२४ मा दक्षिण अफ्रिका र अस्ट्रेलियाविरुद्धको एकदिवसीय अन्तर्राष्ट्रिय शृंखला जितेको थियो । तर, सन् २०२५ मा भने टोलीले गतिलो प्रदर्शन गर्न सकेन ।
खासगरी, घरेलु मैदानमा खेलिएको आईसीसी च्याम्पियन्स ट्रफीमा पाकिस्तानी टोली पहिलो चरणबाटै बाहिरिएको थियो । त्यसपछि रिजवानको कप्तानीको व्यापक आलोचना भएको थियो ।
कप्तानको भूमिकामा रहँदा रिजवानले करिब ४२ को औसतले रन बनाएका छन् । यो सकारात्मक पक्ष हो । तर, उनको कप्तानी र निर्णय लिने क्षमताको विषयमा भने प्रश्न उठाइएको थियो ।
साहिन शाह अफरिदी दोस्रो पटक सीमित ढाँचाको प्रतियोगितामा पाकिस्तानी टोलीका कप्तान बनेका हुन् । यसअघि, उनी सन् २०२४ को जनवरीमा खेलिएको न्युजिल्यान्डविरुद्धको टी–२० शृंखलामा टोलीको कप्तान थिए । उक्त शृंखलामा पाकिस्तानी टोली ४–१ ले पराजित भएको थियो ।
त्यसपछि उनको स्थानमा बाबर आजमलाई कप्तान बनाइएको थियो । पछिल्लो समय साहिन शाह अफरिदी लयमा छन् । उनी पछिल्लो एक वर्षयता पाकिस्तानका लागि सबैभन्दा बढी विकेट लिने बलर पनि बनेका छन् ।
