०३ साउन २०८३, आइतबार
पहिलो एकदिवसीय अन्तर्राष्ट्रिय क्रिकेटमा न्युजिल्यान्डले भ्रमणकारी टोली इङ्ल्यान्डलाई चार विकेटले पराजित गरेको छ । जीतसँगै न्युजिल्यान्डले तीन खेलको शृंखलामा १–० को अग्रता बनाएको छ ।
टस हारेर पहिले ब्याटिङको निम्तो पाएको इङ्ल्यान्डले ३५.२ ओभरमै अलआउट हुनुअघि दुई सय २३ रनमात्र बनाउन सक्यो । जवाफी ब्याटिङमा ओर्लिएको न्युजिल्यान्डले ३६.४ ओभरमा ६ विकेट गुमाएर विजयलक्ष्य पूरा गर्यो ।
न्युजिल्यान्डको जीतमा ड्यारल मिचेलले अविजित ७८ रनको योगदान गरे । उनले ९१ बलमा दुई छक्का र सात चौका पनि हिर्काए । माइकल ब्रासवेलले पनि ५१ रनको योगदान गरे ।
कप्तान मिचेल सान्टनरले २७ र विकेटकिपर ब्याट्सम्यान टम लाथमले २४ रन बटुले । इङ्ल्यान्डका बलर ब्राइडन कार्सले तीन विकेट लिए ।
त्यसअघि, इङ्ल्यान्डका लागि कप्तान ह्यारी ब्रुकले एक सय ३५ रनको योगदान गरेका थिए । तर, उनको शतक टोलीको जीतका लागि पर्याप्त हुन सकेन । उनले केवल एक सय एक बलको सामना गरी ११ छक्का र नौ चौका हिर्काएका थिए ।
इङ्ल्यान्डका लागि जामी ओभरटनले पनि ४६ रन बनाएका थिए । इङ्ल्यान्डका अन्य ब्याट्सम्यानले भने दोहोरो अंकमा रन बनाउन सकेनन् । न्युजिल्यान्डका बलर जाकरी फाउल्क्सले चार विकेट लिए ।
ज्याक डफीले पनि तीन विकेट हात पारे । म्याट हेनरीले दुई विकेट कुम्ल्याए । मिचेल सान्टनरले पनि एक विकेट लिए । टोली पराजित भए पनि ह्यारी ब्रुक प्लेयर अफ दि म्याच घोषित भए ।
दोस्रो एकदिवसीय बुधबार ह्यामिल्टनमा खेलिने छ ।
