०३ साउन २०८३, आइतबार
युवा तथा खेलकुदमन्त्री बब्लु गुप्ताले अखिल नेपाल फुटबल संघ (एन्फा) को व्यवस्थापकीय कमजोरीप्रति चर्को असन्तुष्टि व्यक्त गरेका छन् । भारत भ्रमणमा रहेको नेपाली राष्ट्रिय महिला फुटबल टोलीले उचित व्यवस्थापन नपाएको खबर सार्वजनिक भएपछि मन्त्री गुप्ताले सिधै एन्फाका महासचिव किरण राईलाई फोन गरी कडा शब्दमा आफ्नो आक्रोश पोखेका हुन् ।
मन्त्री गुप्ताले महासचिव राईलाई फोनमा हकारेको भिडियो सामाजिक सञ्जालमा भाइरल बनेको छ । गाडीमा यात्रा गरिरहेका मन्त्री गुप्ताले फोनमा महासचिव राईसँग खेलाडीको दयनीय अवस्थाबारे सोधपुछ गर्दै एन्फाको गैरजिम्मेवारपनप्रति प्रश्न उठाएका थिए ।
फोन संवादको सुरुवातमा मन्त्री गुप्ताले महिला टोलीको खेलको नतिजाबारे सामान्य सोधपुछ गरेका थिए । महासचिव राईले भारतलाई जितेको र इरानसँग हारेको जानकारी दिएपछि मन्त्री गुप्ता सिधै मुख्य विषयमा प्रवेश गरेका थिए ।
"त्यो हाम्रो बीसौं राष्ट्रिय खेलाडीहरूको, फुटबलको हजुर महिलाको, के हो त उनीहरूको?" भन्दै मन्त्रीले कुरा सुरु गरेका थिए ।
उनले आक्रोशित हुँदै थपे, "तपाईंले त्यहाँनिर खानाको विषय उठेको छ, ट्राभलको कुरा उठेको छ, त्यहाँनिर म्यानेजमेन्ट भएन भन्ने कुराहरू आइराखेको छ । तपाईंहरूले त अनि खाना पनि टाइममा नखुवाएर ट्राभल मात्र गराउनुभयो त अनि ! सुत्न पनि त्यस्तै तीन-चार घण्टा मात्र पाएको छ भन्ने कुरा छ ।"
जवाफमा महासचिव राईले व्यवस्थापनको जिम्मा आयोजक भारतीय फुटबल संघको भएको भन्दै पन्छिन खोजेका थिए । "त्यो चाहिँ इन्डियनले नै म्यानेज गर्छ के त्यहाँ," राईले भनेका थिए ।
तर, मन्त्री गुप्ता राईको जवाफबाट सन्तुष्ट भएनन् । उनले राष्ट्रिय खेलाडीलाई विदेश पठाउँदा सम्पूर्ण व्यवस्थापनको पूर्वतयारी र विस्तृत तालिका एन्फासँग हुनुपर्नेमा जोड दिए ।
