२२ असार २०८३, सोमबार
रुपन्देहीमा उत्पादन भएको नेपाली फ्रेन्च फ्राइज (आलुको परिकार) पहिलोपटक अमेरिका निर्यात शुरू भएको छ ।
जिल्लाको सुद्धोधन गाउँपालिकामा फस्ट च्वाइस फूड्सले यसअघि नेपाली बजारसँगै भारतमा पनि निर्यात गर्दै आइरहेकोमा पहिलोपटक तेस्रो मुलुकतर्फ निर्यात थालेको हो ।
जिल्लाको सुद्धोधन गाउँपालिकामा सञ्चालित उद्योगले मंगलबार भैरहवा भन्सार कार्यालयबाट पहिलोपटक २१/२१ टनका दुईवटा कन्टेन्टर कोलकत्ता बन्दरगाह लागि छुटाएको हो ।
४२ मेट्रिकटन फ्रेन्च फ्राइज मूल्य ५८ लाख रुपैयाँ (अमेरिकी ३८ हजार ४८० डलर)मा अमेरिकी आयातकर्ता एलएलसीलाई पठाइएको हो ।
उद्योगका सञ्चालनका कृष्ण पौडेलले आयात प्रतिस्थापन गर्ने उद्देश्यले नेपालमै उद्योग सञ्चालन गरेका हुन् । ती सामान रेफ्रिजेरेटरसहित वातानुकूलित अवस्थामा कोलकत्ता बन्दरगाहसम्म लगिने छ ।
कोलकत्ताबाट पानी जहाजमा फ्रेन्च फ्राइज अमेरिका पुग्नेछ । हिमाल क्रिप्ट र हाम्रो फ्राइज ब्रान्डका फ्रेन्च फ्राइज निर्यात भएको पौडेलले जानकारी दिए ।
पौडेलका अनुसार कोलकत्ताबाट कन्टेनरमा ५० दिनमा फ्रेन्च फ्राइज अमेरिका पुग्नेछ । अमेरिका निर्यात हुनुअघि त्यहाँको सम्बन्धित निकायले नेपाली आलुबाट बनेको फ्रेन्च फ्राइजको गुणस्तर चेकजाँच गरी निर्यातको अनुमति दिएको पौडेलको भनाइ छ । अबदेखि हरेक हप्ता अमेरिकाका लागि भैरहवा भन्सार कार्यालयबाट फ्रेन्च फ्राइज निर्यात हुनेछ ।
‘अमेरिकासँगै बेलायत लगायतका मुलुकबाट पनि अर्डर आएको छ । भारत र नेपाली बजारमा समेत खपत भइरहेकाले मागअनुसार उत्पादन पुर्याउन सकेका छैनौं,’ पौडेलले भने, ‘नेपालमा खपत हुने फ्रेन्च फ्राइज विदेशबाट आयात हुने गरेको थियो । अहिले ७५ प्रतिशत आयत विस्थापित भइसकेको छ । अबको एक वर्षभित्र आयत पूर्णरूपमा विस्थापित गर्ने लक्ष्य छ ।’
आफ्नो उत्पादन अमेरिकाजस्तो मुलुकमा पठाउन पाउँदा निकै खुशी लागेको पौडेलले बताए । अन्तर्राष्ट्रिय बजारमा प्रतिस्पर्धा गर्न स्वदेशी उत्पादन सक्षम छ भन्ने प्रेरणा र सन्देश देशभरका उद्योगीलाई दिएको पौडेलको भनाइ छ । पौडेलसँग देशभरका ३५ हजार किसान जोडिएका छन् ।
उनीहरूलाई मल, बिउ, सिँचाइको व्यवस्था, विषादी कृषि अनुदानको योजना तथा प्राविधिक सहयोग पनि उद्योगले दिँदै आएको छ ।
दुई अर्ब लगानीमा स्थापित उद्योगले नेपालका २६ जिल्लाका किसानबाट आलु खरिद गरी प्रशोधन गरेर फ्रेन्च फ्राइज उत्पादन गरिरहेको छ ।
भैरहवा भन्सार कार्यालयका प्रमुख शिवलाल न्यौपानेले पहिलोपटक नेपाली फ्रेन्च फ्राइज अमेरिका निर्यात शुरू भएको र यसबाट ४० हजार अमेरिकी डलर नेपाललाई प्राप्त भएको बताए ।
देशले ठूलो व्यापार घाटा व्यहोरिरहेको अवस्थामा स्वदेशी कच्चा पदार्थबाट उत्पादित खाद्य वस्तु निर्यातले थोरै भए पनि व्यापार घाटा कम गराउन योगदान पुग्ने न्यौपानेको भनाइ छ ।
अमेरिकी प्रतिस्पर्धी बजारमा नयाँ नेपाली उद्योगको विकास, वैदेशिक मुद्रा आर्जन र उद्यमशीलताका हिसाबले महत्त्वपूर्ण रहेको भन्सार कार्यालयका सूचना अधिकारी सन्तोषकुमार न्यौपानेले बताए ।
युरोपियन प्रविधिमा आधारित आलु प्रशोधन उद्योगबाट फ्रेन्च फ्राइजसँगै केही महिनाभित्रै आलु टिक्की, बर्गर, प्याटी, स्माइली ह्यास बाउन लगायत परिकार उत्पादन गर्ने उद्योगको तयारी छ ।
‘हिमालय र हाम्रो फ्राइज ब्रान्डमार्फत नेपालको स्वादलाई विश्वमा पुर्याउन सफल भएका छौं’, पौडेलले भने, ‘अमेरिकाको एफडीएमा दर्ता भएर छोटो समयमा भारतसँगै अमेरिका निर्यात गरिरहेका छौं । अब यूएई, मलेसिया, साउदी अरब जस्ता मुलुकमा पनि निर्यात गर्ने तयारीमा छौं ।’
५ बिगाहा क्षेत्रफलमा फैलिएको उद्योगले विश्वस्तरीय फ्रोजन पोटाटो र फ्राइज उत्पादन गरेर संसारकै जुनसुकै ब्रान्डसँग प्रतिस्पर्धा गर्न सक्षम रहेको पौडेलको भनाइ छ । कैलाली, नवलपुर, सिन्धुली, काभ्रेपलाञ्चोक लगायतका २६ जिल्लामा सफल परीक्षण गरी ३५ हजार किसानमार्फत आलु उत्पादन भएको छ ।
काठमाडौं, पोखरा, चितवन, बुटवल, इटहरि, दाङ, नेपालगञ्जजस्ता प्रमुख शहरहरूमा ५ वटा वितरक, १२ चेन रेस्टुरेन्ट, १५० सप्लायर्स, ४०० भन्दा बढी रेस्टुरेन्ट, १७१ मोडर्न मार्टमार्फत उपभोक्तामाझ पुगेको छ ।
किसानलाई आत्मनिर्भर बनाउँदै नेपालमा नै उत्पादन भएको प्रशोधनयोग्य आलु प्राथमिकताका आधारमा खरिद गर्ने उद्योगले लक्ष्य लिएको छ ।
उद्योगले किसानबाट ४० हजार मेट्रिक टन आलु खरिद गरी प्रशोधन गरेर विभिन्न परिकार बनाउने लक्ष्य लिएको छ । फस्ट च्वाइस फूड्सले फ्रेन्च फ्राइजका लागि नेदरल्यान्डबाट उन्नत जातको आलुको बिउ ल्याएर किसानलाई वितरण गरेको थियो ।
उद्योगलाई आवश्यक पर्ने आलु नेपालमै उत्पादन भएको र पूर्णरूपमा सञ्चालन गर्न नेपालमै उत्पादित आलुले पुग्ने उनले बताए । आलु उत्पादनका लागि डा. श्यामप्रसाद ढकाल पनि जोडिएका छन् । उद्योगले जर्मनी, टर्की र जापानबाट विभिन्न प्रविधि भित्र्याएको छ ।
उद्योगले वार्षिक ५ अर्बको फ्रेन्च फ्राइज उत्पादन गर्ने लक्ष्य राखेको छ । नेपालमा हाल भारत, बेल्जियम र अन्य केही मुलुकबाट आलुको परिकार मात्रै वार्षिक १५ अर्बको आयात हुने गरेको तथ्यांक छ ।
फ्रेन्च फ्राइज माइनस १८ डिग्री सेल्सियस तापक्रममा भण्डार गर्न सकिन्छ । नेपाली बजारमा पनि माग उच्च रहेकाले खपतमा कुनै समस्या छैन । उद्योग दैनिक १० घण्टा सञ्चालन हुँदा वार्षिक ४० हजार टन आलु आवश्यक पर्छ ।
यो आवश्यकता पूरा गर्न उद्योगले आलु उत्पादनमा पनि लगानी गरेको छ । गुल्मीबाट बुटवल झरेका पौडेल बुटवलको क्वालिटी मिट शपबाट व्यवसाय शुरू गरेका थिए । डेढ दशकअघि मासु पसललाई विस्तार गर्दै मासु प्रशोधन उद्योग सञ्चालनमा ल्याए । आफ्नै उद्योगको मासुको परिकारको व्यापार गर्दा पौडेलले भारतको एक फ्रेन्च फ्राइज कम्पनीको आधिकारिक बिक्रेताको पनि अनुभव लिएका थिए ।
