०४ साउन २०८३, सोमबार
न्युजिल्यान्डले बिहीबार खेलिएको दोस्रो टी–२० अन्तर्राष्ट्रिय क्रिकेटमा भ्रमणकारी टोली वेस्ट इन्डिजमाथि तीन रनको जीत हासिल गरेको छ । अकल्यान्डमा खेलिएको न्युजिल्यान्ड र वेस्ट इन्डिजबीचको खेल निकै रोमाञ्चक बन्यो ।
ठूलो विजयी लक्ष्य पछ्याएको क्यारेबियन टोलीले खेलमा उत्कृष्ट पुनरागमन गर्दै अन्तिम समयसम्म जीतका लागि संघर्ष गरेको थियो । तर, अन्तिम ओभरको अन्तिम बलमा नतिजा घरेलु टोली न्युजिल्यान्डको पोल्टामा पर्यो ।
न्युजिल्यान्डको जीतपछि पाँच खेलको शृंखला १–१ को बराबरीमा पुगेको छ । यसअघि खेलिएको पहिलो खेलमा वेस्ट इन्डिजले न्युजिल्यान्डलाई सात रनले हराएको थियो । शृंखलाको तेस्रो खेल आइतबार नेल्सनमा खेलिने छ ।
बिहीबारको खेलमा टस हारी पहिले ब्याटिङको निम्तो पाएको न्युजिल्यान्डले निर्धारित ओभरमा पाँच विकेट गुमाएर दुई सय सात रन बनाएको थियो । न्युजिल्यान्डका लागि मार्क च्यापम्यानले ७८ रनको योगदान गरे ।
चौथो नम्बरमा क्रिज समाल्न आएर प्रारम्भदेखि नै आक्रामक रूपमा प्रस्तुत भएका मार्कले केवल २८ बलको सामना गरी सात छक्का र ६ चौका हिर्काएका थिए । उनले क्यारेबियन टोलीका बलरहरूलाई असिन–पसिन पारेका थिए ।
ओपनर ब्याट्सम्यान टिम रोविन्सनले पनि ३९ रन बनाए । उनले २५ बलमा एक छक्का र पाँच चौका प्रहार गरे । ड्यारल मिचेलले अविजित २८ रन बनाए । कप्तान मिचेल सान्टनर १८ रनमा अविजित रहे । वेस्ट इन्डिजका बलर रोस्टन चेजले दुई विकेट लिए ।
ठूलो विजयी लक्ष्य पछ्याउँदै जवाफी ब्याटिङमा ओर्लिएको वेस्ट इन्डिजले टोलीको कुल स्कोर एक सय रन पुग्नुअघि नै आफ्नो ६ विकेट गुमाइसकेको थियो । सोही कारणले वेस्ट इन्डिज जीतबाट निकै टाढा पुगिसकेको थियो ।
क्यारेबियन टोलीका ओपनर ब्याट्सम्यान ब्रान्डन किङ खाता खोल्नुअघि नै पेभेलियन फर्किएका थिए भने अर्का ओपनर एलिक अथान्ज पनि ३३ रन बनाउँदै आउट भएका थिए । कप्तान साई होप पनि २४ रनभन्दा अगाडि बढ्न सकेनन् ।
१४ ओभरको खेल सकिँदा वेस्ट इन्डिजले ६ विकेट गुमाएर केवल एक सय सात रन बनाउन सकेको थियो । त्यतिबेला वेस्ट इन्डिजलाई जीतका लागि ३६ बलमा एक सय एक रन आवश्यक थियो । त्यतिबेला रोभमन पोवेल रोमारियो शेफर्ड क्रिजमा थिए ।
छैटौं नम्बरका ब्याट्सम्यान पोवेल र आठौं नम्बरमा क्रिज समाल्न आएका शेफर्डले उत्कृष्ट ब्याटिङ गरिरहेका थिए । १५ ओभरको खेल सकिँदा वेस्ट इन्डिजको स्कोर एक सय १७ रन पुगेको थियो । त्यतिबेला वेस्ट इन्डिजलाई जीतका लागि ३० बलमा ९१ रन आवश्यक थियो ।
१६औं ओभरको खेलमा पोवेल र शेफर्डले बाउन्ड्रीको वर्षा गर्दै तीन छक्का र एक चौका हिर्काए । त्यो ओभरमा क्यारेबियन ब्याट्सम्यानले २४ रन लिए । त्यसपछि १६ ओभरको खेल सकिँदा वेस्ट इन्डिजको स्कोर ६ विकेटको नोक्सानीमा एक सय ४१ रन पुगेको थियो । त्यसपछि वेस्ट इन्डिजलाई जीतका लागि २४ बलमा ६७ रन आवश्यक थियो ।
१७औं ओभरको खेलमा पनि वेस्ट इन्डिजले दुई छक्काको मद्दतले १५ रन बटुल्यो । तर, यो ओभरमा वेस्ट इन्डिजले शेफर्डलाई गुमायो । उनी केवल १६ बलमा चार छक्का र एक चौकाको मद्दतले ३४ रन बनाउँदै आउट भए । वेस्ट इन्डिजले गुमाएको यो सातौं विकेट थियो ।
त्यसपछि वेस्ट इन्डिजले जीतका लागि १८ बलमा ५२ रन बनाउनुपर्ने भयो । १८औं ओभरमा पनि क्यारेबियन ब्याट्सम्यान पोवेल र म्याथ्यू फोर्डले कमाल गरे । उनीहरूले तीन छक्का प्रहार गर्दै १८औं ओभरमा कुल २२ रन बटुले ।
१८औं ओभरको खेल सकिँदा वेस्ट इन्डिजको स्कोर एक सय ७८ रन पुगिसकेको थियो । त्यसपछि वेस्ट इन्डिजलाई जीतका लागि १२ बलमा ३० रन आवश्यक थियो । वास्तवमै खेल निकै रोमाञ्चक मोडमा पुगेको थियो र दर्शकहरू पनि भरपुर मजा लिइरहेका थिए ।
१९औं ओभरमा क्यारेबियन ब्याट्सम्यानले एक छक्का र एक चौकाको मद्दतले थप १४ रन बटुले । त्यसपछि वेस्ट इन्डिजको स्कोर एक सय ९२ रन पुग्यो । अब अन्तिम ६ बलमा वेस्ट इन्डिजलाई जीतका लागि १६ रन आवश्यक थियो ।
अन्तिम ओभरमा न्युजिल्यान्डका कायल जामिसन बलिङ गर्न आएका थिए । अन्तिम ओभरको पहिलो बलमा फोर्डले चौका प्रहार गरे । दोस्रो बलमा फोर्डले रन लिन सकेनन् । जामिसनले फालेको तेस्रो बल ‘नो बल’ घोषित भयो । त्यो बलमा फोर्डले चौका प्रहार गरेपछि पाँच रन आयो ।
त्यसपछि ‘फ्रि हिट’ मा फोर्डले एक रनमात्र लिन सके । यसरी, अन्तिम तीन बल बाँकी रहँदा वेस्ट इन्डिजलाई जीतका लागि केवल ६ रन आवश्यक थियो । दूर्भाग्य, चौथो बलमा वेस्ट इन्डिजले विकेट गुमायो । पोवेल आठौं विकेटका रूपमा पेभेलियन फर्किए ।
आउट हुनुअघि उनले केवल १६ बलमा ६ छक्का र एक चौकाको मद्दतले ४५ रन बनाएका थिए । त्यसपछि अन्तिम दुई बलमा वेस्ट इन्डिजलाई जीतका लागि ६ रन आवश्यक थियो । पाँचौं बलमा अकिल होसैनले एक रन मात्र लिन सके ।
त्यसपछि, अन्तिम बलमा वेस्ट इन्डिजलाई जीतका लागि पाँच रन चाहिएको थियो । चार रनमात्र बनाए पनि खेल बराबरी हुन्थ्यो र ‘सुपर ओभर’मा जान्थ्यो । तर, अन्तिम बलमा फोर्डले एक रन मात्र लिन सके । यसरी अन्तत: खेलमा न्युजिल्यान्ड तीन रनले विजयी भयो । वास्तवमै यो निकै रोमाञ्चक खेल थियो ।
