विद्यार्थी नेता ओस्मान हादीको मृत्यु भएको केही दिनमै बंगलादेशमा अर्का एक विद्यार्थी नेतामाथि गोली प्रहार भएको छ ।

सोमबार खुल्ना शहरमा नेशनल सिटिजन पार्टी (एनसीपी)का नेता मोतालेब सिकदरमाथि गोली प्रहार भएको हो । आक्रमणकारीले उनको टाउको लक्षित गरी गोली चलाएको ‘द डेली स्टार’ले जनाएको छ ।

सोनाडांगा मोडल प्रहरी चौकीका अनुसन्धान अधिकृत अनिमेष मण्डलका अनुसार सोमबार बिहान करिब ११:४५ बजे अज्ञात व्यक्तिहरूले मोतालेबमाथि गोली चलाएका थिए । गम्भीर अवस्थामा उनलाई तत्काल खुल्ना मेडिकल कलेज अस्पताल लगिएको थियो ।

प्रहरीका अनुसार मोतालेबको अवस्था अहिले खतरामुक्त छ । गोली उनको कानको एकपट्टि प्रवेश गरी छाला छेड्दै अर्को पट्टिबाट बाहिरिएको प्रहरीले जनाएको छ ।

मोतालेब सिकदर नेशनल सिटिजन पार्टीका खुल्ना विभागीय प्रमुख तथा एनसीपी श्रमिक शक्ति केन्द्रीय आयोजक हुन् । पार्टीकी संयुक्त प्रमुख समन्वयक महमुदा मितुले सामाजिक सञ्जालमार्फत उक्त जानकारी दिएकी हुन् ।

नेशनल सिटिजन पार्टी सन् २०२४ को विद्यार्थी आन्दोलनपछि ‘स्टुडेन्ट्स अगेन्स्ट डिस्क्रिमिनेसन’ र ‘जातिया नागरिक कमिटी’को पहलमा गठन गरिएको हो । बंगलादेशको इतिहासमै पहिलो विद्यार्थी नेतृत्वको राजनीतिक दलका रूपमा यस पार्टीको स्थापना यही वर्ष फेब्रुअरी २८ मा भएको थियो ।

ओस्मान हादीको हत्या

२०२४ को विद्यार्थी आन्दोलनका नेता ओस्मान हादी डिसेम्बर १२ मा ढाकामा भएको आक्रमणमा गोली लागेपछि गम्भीर घाइते भएका थिए । 

उपचारका लागि डिसेम्बर १५ मा उनलाई सिंगापुर जनरल अस्पतालको न्युरोसर्जिकल आईसीयूमा हवाईमार्गबाट लगिएको थियो ।

तर, सिंगापुरको विदेश मन्त्रालयका अनुसार चिकित्सकहरूको प्रयासका बाबजुद डिसेम्बर १८ मा हादीको मृत्यु भएको थियो ।

बंगलादेश प्रहरीले आइतबारसम्म पनि हादीको हत्याका मुख्य संदिग्धको ठेगानाबारे कुनै ठोस जानकारी नभएको जनाएको छ । यसअघि हादीको पार्टी ‘इन्किलाब मञ्च’ले अन्तरिम सरकारलाई २४ घण्टे अल्टिमेटम दिँदै दोषीको गिरफ्तारीमा ‘देखिने प्रगति’ माग गरेको थियो ।

हादीको मृत्युपछि देशका विभिन्न स्थानमा हिंसा र तोडफोडका घटना भएका थिए । चटग्रामस्थित भारतीय सहायक उच्चायोगको निवासमा ढुंगामुढासमेत भएको थियो ।

कडा सुरक्षा व्यवस्थाबीच शनिबार ढाका विश्वविद्यालय मस्जिद नजिक राष्ट्रिय कवि काजी नजरुल इस्लामको समाधिस्थल छेउमै ओस्मान हादीको अन्त्येष्टि गरिएको थियो ।