०८ साउन २०८३, शुक्रबार
एन्फा राष्ट्रिय लिग फुटबल प्रतियोगिताको बिहीबार सम्पन्न खेलमा सशस्त्र प्रहरी बलको एपीएफ क्लबले चर्च ब्वाइज युनाइटेड क्लबलाई ४–१ गोलको फराकिलो अन्तरले हराएको छ ।
एपीएफको जितमा युवराज खड्काले दुई गोलको योगदान गरे । विभागीय टोली एपीएफ क्लबले पहिलो हाफमै २–० गोलको अग्रता लिएको थियो ।
निर्धारित समयको २२ औं मिनेटमा एपीएफ क्लबका लागि समिराज थोकरले पहिलो गोल गरे । ३८ औं मिनेटमा प्रदीप लामाले टोलीको अग्रता दोब्बर बनाए ।
निर्धारित समयको ६० औं मिनेटमा युवराज खड्काले टोलीका लागि तेस्रो गोल गरे । ७७ औं मिनेटमा उनले नै व्यक्तिगत रूपमा दोस्रो गोल गरे ।
पराजित टोली चर्च ब्वाइज युनाइटेडका लागि एकमात्र गोल मिलन राईले निर्धारित समयको ८२ औं मिनेटमा गरेका थिए ।
चर्च ब्वाइज युनाइटेड क्लब पछिल्लो सहिद स्मारक ‘ए’ डिभिजन लिगमा च्याम्पियन बनेको थियो । सोही आधारमा चर्च ब्वाइज युनाइटेड जारी राष्ट्रिय लिगमा सहभागी भएको हो ।
एपीएफ क्लब भने पछिल्लो सहिद स्मारक ‘ए’ डिभिजन लिगमा शुरूमा रेलिगेसनमा परेको थियो । तर, थ्रीस्टार क्लबले नियम विपरीतका खेलाडी खेलाएर जावलाखेललाई पराजित गरेको खेलको नतिजा उल्टिएपछि एपीएफ ‘ए’ डिभिजनमै रहन सफल भएको थियो ।
एन्फाले ११ वर्षपछि राष्ट्रिय लिग आयोजना गरेको हो । पहिलो संस्करण २०६८ सालमा आयोजना भएको थियो । पहिलो संस्करणमा नेपाल पुलिस क्लब च्याम्पियन बनेको थियो ।
यसैगरी, दोस्रो संस्करण २०७१ सालमा आयोजना भएको थियो । दोस्रो संस्करणमा थ्रीस्टार क्लब च्याम्पियन बनेको थियो ।
तेस्रो संस्करणको विजेताले ५० लाख रूपैयाँ पुरस्कार पाउने छ । दोस्रो हुने टोलीलाई २५ लाख रूपैयाँ पुरस्कार प्रदान गरिने छ । तेस्रो हुने टोलीले १५ लाख रूपैयाँ नगद पुरस्कार हात पार्नेछ ।
फेयर प्ले पुरस्कार पाउने टोलीलाई पनि एक लाख रूपैयाँ प्रदान गरिने छ । सर्वोत्कृष्ट खेलाडीलाई पनि एक लाख रूपैयाँ प्रदान गरिने छ । सर्वाधिक गोलकर्ताले पनि एक लाख रूपैयाँ पाउनेछ ।
यसैगरी, सर्वोत्कृष्ट गोलरक्षकलाई एक लाख र प्रत्येक खेलको प्लेयर अफ दि म्याचलाई पाँच हजार रूपैयाँ प्रदान गरिने छ ।
प्रत्येक खेलको विजेता टोलीलाई अतिरिक्त २० हजार रूपैयाँ र प्रत्येक खेलको पराजित टोलीलाई १० हजार रूपैयाँ प्रदान गरिने छ । खेल बराबरीमा सकिए दुबै टोलीले १५–१५ हजार रूपैयाँ पाउनेछन् ।
