काठमाडौंमा रोजगारी अभावको चित्र निर्वाचन प्रहरी (म्यादी)मा भर्ती हुन आवेदन दिनेहरूको सूचीले देखाएको छ ।

आगामी फागुन २१ गते हुने प्रतिनिधिसभा सदस्य निर्वाचनका लागि आवश्यक निर्वाचन प्रहरी बन्न काठमाडौंमा मात्रै सात हजार ६३ जनाले आवेदन दिएका थिए । त्यसमध्ये तीन हजार ८ सय ८५ जना तालिमका लागि छनोट भएका छन् । छनोट भएकाहरूको तालिम आइतबारदेखि शुरू भएको छ ।

जिल्ला प्रहरी परिसर काठमाडौंका प्रहरी नायब उपरीक्षक (डीएसपी) कौशल बुढाथोकीका अनुसार निर्वाचन प्रहरी बन्न स्नातकोत्तर (मास्टर्स डिग्री) पास गरेकादेखि इन्जिनीयरसम्मले आवेदन दिएका थिए ।

छनोट भएकामध्ये ६ जना स्नातकोत्तर गरेका, ३५ जना स्नातक गरेका, ९ सय ६१ जना प्लस टु गरेका, एक हजार ३८ जना एसएलसी/एसईई गरेका, तीन सय ५१ जना पाँच देखि नौ कक्षासम्म पढेका र एक हजार चार सय ६२ जना सामान्य लेखपढ जान्नेहरू छन् ।

छनोट भएकामध्ये दुई हजार सात सय एक जना पुरुष र एक हजार एक सय ५३ जना महिला छन् ।

काठमाडौं प्रहरी परिसरका अनुसार वैकल्पिकसहितको उत्तीर्ण संख्या पाँच हजार तीन सय २९ छ । तर, तालिमका लागि तीन हजार ८ सय ५४ जनालाई समेटिएको छ । प्रहरी र सशस्त्र प्रहरीका विभिन्न कार्यालयमा तालिम गराउन शुरू भइसकेको परिसरले जनाएको छ ।

पूर्व सुरक्षाकर्मी मात्रै ७४९

डीएसपी बुढाथोकीका अनुसार आवेदन दिएर छनोट भएकामा सात सय ४९ जना पूर्व सुरक्षाकर्मी (पूर्व म्यादीसहित) छन् ।

जसअनुसार नेपाली सेनाबाट अवकाश पाएका ८७ जना, प्रहरीबाट अवकाश पाएका  २० जना, सशस्त्र प्रहरीबाट अवकाश पाएका ६ जना, पूर्व सुरक्षागार्ड ४० जना र पूर्व म्यादी पाँच सय ९६ जना छनोट भएका छन् ।

मतदान केन्द्रमा सुरक्षाकर्मीसँग समन्वय गरेर निर्वाचन प्रहरीलाई परिचालन गरिने छ ।

‘सुरक्षा निकायमा जागिर खाएर अवकाश पाएकालाई राख्दा मतदान केन्द्रको सुरक्षा थप मजबुत हुने देखिन्छ,’ परिसरका एक अधिकृतले लोकान्तरसँग भने, ‘पूर्व सुरक्षाकर्मीले रणनीतिक तहबाट आफ्नो जिम्मेवारी पूरा गर्छन् ।’​

देशभरबाट एक लाख ४९ हजार छनोट

देशभरबाट एक लाख ४९ हजार ९० जना निर्वाचन प्रहरी छनोट भएका छन् । उनीहरूलाई १० दिनको तालिम दिएर निर्वाचन सुरक्षामा ४० दिने कार्यावधि तोकेर खटाइने छ ।

प्रहरी प्रधान कार्यालयका अनुसार नेपाल प्रहरी मातहत खटिने गरी १ लाख ३३ हजार ९ सय ८० र सशस्त्र प्रहरी बलअन्तर्गत १५ हजार १ सय १० गरी कुल १ लाख ४९ हजार ९० जना निर्वाचन प्रहरी छानिएका हुन् । 

निर्वाचन प्रहरीलाई आधारभूत सुरक्षा तालिमअन्तर्गत आफूभन्दा माथिल्लो तहका प्रहरीलाई गर्ने शिष्टाचार कसरी देखाउने, फिल्डमा सर्वसाधारणसँग कसरी व्यवहार गर्ने र शारीरिक पोजिसन कसरी मिलाउने लगायतका व्यवहारको प्रशिक्षण दिइन्छ ।

प्रहरीका केन्द्रीय प्रवक्ता एवं प्रहरी नायब महानिरीक्षक अविनारायण काफ्लेका अनुसार निर्वाचन प्रहरीले चुनावलाई लक्षित गरेर कुनै पनि व्यक्तिगत धारणा राख्न पाउँदैनन् । कुनै दल वा उम्मेदवारको पक्ष वा विपक्षमा गतिविधि गर्न पूर्ण निषेध छ ।

निर्वाचन प्रहरीले तालिम सकाएपछि प्रहरी वा सशस्त्र प्रहरीको युनिटप्रति पूर्ण जवाफदेही भएर काम गर्नुपर्छ ।

काफ्लेका अनुसार गत पुस २५ गतेदेखि माघ ३ सम्म निर्वाचन प्रहरीका लागि दरखास्त आह्वान गरिएको थियो । देशभरबाट करिब २ लाख जनाले आवेदन दिएका थिए । लिखित र स्वास्थ्य परीक्षणबाट उत्तीर्ण भएकाहरूलाई आइतबारबाटै नियुक्ति पत्र दिई तालिममा खटाइएको जानकारी नायब महानिरीक्षक काफ्लेले दिए ।

‘निर्वाचन प्रहरी भर्ना छनोट नियुक्ति तथा परिचालनसम्बन्धी एकीकृत (प्रहरी र सशस्त्र प्रहरी बल नेपाल) कार्यविधि– २०८२ अनुसार एकजना निर्वाचन प्रहरीलाई दैनिक ८ सय ६९ रुपैयाँ ४० पैसाले हुने ४० दिनको ३४ हजार रुपैयाँ तलब, जिल्ला दररेट निर्धारण समितिले तोकेअनुसार सुरक्षाकर्मीले पाएसरह ४० दिनको रासन भत्ता (जिल्लाअनुसार फरक–फरक), निर्वाचनमा खटाइएको ठाउँमा जान र फर्किनलाई एकपटकका लागि प्रतिव्यक्ति ८४६ रुपैयाँ (यातायात भत्ता), चार दिनका लागि प्रतिदिन ३ सय रुपैयाँका दरले खाजा खर्चबापत एकमुष्ट १२ सय रुपैयाँ तथा जिल्लाको मौसमअनुसार प्रहरी र सशस्त्रले त्यस जिल्लामा निर्धारण गरेको पोशाक भत्ताअनुसार कपडाको खर्च व्यवस्था गरिएको जानकारी प्रहरी मुख्यालयले दिएको छ ।