०३ साउन २०८३, आइतबार
अफगानिस्तानले पाकिस्तानमा जवाफी आक्रमण गरेको छ । बिहीबार राति कुनार प्रान्तमा तालिबान लडाकुहरूले गरेको आक्रमणमा ५५ पाकिस्तानी सैनिक मारिएको तालिबान प्रवक्ता जबिहुल्लाह मुजाहिदलाई उद्धृत गर्दै टोलो न्यूजले जनाएको छ ।
अफगान सरकारले २३ पाकिस्तानी सैनिकको शव आफूसँग भएको दाबी गरेको छ । पाकिस्तानी सेनाको एक मुख्यालय र १९ चौकी पनि कब्जा गरिएको समाचारमा उल्लेख छ ।
अफगानिस्तानका उपप्रवक्ता हमदुल्लाह फित्रतले केही पाकिस्तानी सैनिकहरूलाई जीवितै कब्जा गरिएको बताएका छन् भने धेरै हतियार, एउटा ट्याङ्क र एउटा हार्वेस्टर कब्जा गरिएको बताएका छन्।
पाकिस्तानी मिडियाका अनुसार, पाकिस्तानी सरकारले बदलामा अपरेशन गजब लिल हक शुरू गरेको छ। पाकिस्तानी वायुसेनाले काबुल र नान्गारहार प्रान्तलगायत धेरै शहरहरूमा हवाई आक्रमण गरेको समाचारमा उल्लेख छ ।
सरकारले अहिलेसम्म ७२ अफगान तालिबान लडाकुहरू मारिएको र १२० भन्दा बढी घाइते भएको दाबी गरेको छ। १६ तालिबान चौकीहरू ध्वस्त पारिएको र ७ कब्जा गरिएको छ।
आक्रमणपछि पाकिस्तान र तालिबान सरकारले क्षतिबारे छुट्टाछुट्टै दाबी गरेका छन् । अफगान रक्षा मन्त्रालयले ५५ पाकिस्तानी सैनिक मारिएको बताएको छ, जसमध्ये केहीको शव अफगानिस्तान लगिएको छ भने धेरैलाई जीवितै पक्राउ गरिएको छ ।
आक्रमणमा पाकिस्तानले आफ्ना ८ सैनिक गुमाएको छ भने घाइतेको संख्या ११ रहेको छ। मन्त्रालयले १९ पाकिस्तानी सेनाको चौकी र दुई अड्डाहरू ध्वस्त पारेको बताएको छ र आक्रमण शुरू भएको लगभग चार घण्टापछि मध्यरातमा लडाइँ समाप्त भएको बताएको छ।
यद्यपि, पाकिस्तानका सूचना मन्त्री अताउल्लाह तरारले ३६ अफगानी लडाकु मारिएको बताएका छन् ।
नान्गरहार, नुरिस्तान, कुनार, खोस्ट, पक्तिया र पक्तिका जस्ता सीमावर्ती क्षेत्रहरूमा दुई पक्षबीच लडाईं जारी छ। यी चौकीहरू नान्गरहारको गोश्ता जिल्ला र कुनार प्रान्तमा डुरान्ड रेखा नजिकै अवस्थित छन् ।
पाकिस्तानले फेब्रुअरी २२ मा अफगानिस्तानको भित्री भागमा हवाई हमला गरेको थियो ।
