राष्ट्रिय स्वतन्त्र पार्टी (रास्वपा) का काठमाडौं–५ का संस्थापक क्षेत्रीय संयोजकसहित १४ जनाले सामूहिक राजीनामा दिएका छन् ।

प्रतिनिधि सभा सदस्यका उम्मेदवार रहिसकेका प्रणय राणाले राजीनामा दिएपछि क्षेत्र नम्बर ५ मा पार्टीभित्र असन्तुष्टि बढेको बताइएको छ । त्यसैको निरन्तरतास्वरूप शुक्रबार क्षेत्रीय तहका पदाधिकारी र सदस्यहरूले सामूहिक रूपमा पद त्याग गरेका हुन् ।

राजीनामा पत्रमा उनीहरूले उम्मेदवार छनोट प्रक्रियाको आवरणमा आर्थिक अनियमितता भएको आरोप लगाएका छन् । बेथिति सुधारको साटो उल्टै अनियमितता बढ्दै गएको दाबी गर्दै उनीहरूले लोकतन्त्र र सुशासनको नारासँग पार्टीको व्यवहार नमिलेको उल्लेख गरेका छन् । स्थानीय गतिविधिबाट निराश भएको भन्दै आजैबाट जिम्मेवारी त्यागेको राजीनामा पत्रमा जनाइएको छ ।

राजीनामा दिनेमा संस्थापक क्षेत्रीय संयोजक मधुसुधनध्वज खड्का, बुनपा–३ का नगर प्रतिनिधि राम श्रेष्ठ, बुनपा–३ की जया श्रेष्ठ, बुनपा–४ का सदस्य समिप घले र कवि थापा मगर रहेका छन् ।

यसैगरी वडा पदाधिकारीहरू बुनपा–७ की प्रतिभ सेढाइँ, बुनपा–७ का सदस्य किरण थापा, टोखा रास्वपा सदस्य चिरञ्जिवी अधिकारी, लेखा सदस्य सृजना बस्नेत र शोभा सुवेदी, साथै बुनपा–४ का प्रभात महर्जन, राजेश थापा र अञ्जना बोगटीले पनि राजीनामा दिएका छन् ।