३० असार २०८३, मंगलबार
नेपाली कांग्रेसका नेता रामहरि खतिवडाले पार्टीलाई एकताबद्ध बनाउन पहल गर्नुपर्ने बताएका छन् ।
शेरबहादुर देउवा पक्षबाट निवर्तमान कार्यवाहक सभापति पूर्णबहादुर खड्काले मंगलबार बोलाएको बैठकमा सहभागी भएर फर्किने क्रममा खतिवडाले यस्तो बताएका हुन् ।
पार्टीलाई एकताबद्ध बनाउने काम अरूले गर्ला भनेर पर्खिन नहुने उनले बताए ।
'मुद्दा अदालतमा छ । तर, पार्टीलाई एकताबद्ध बनाएर लैजाने सोच हुनुपर्छ । एकताबद्ध बनाउने पहल यताबाट गर्ने कि उता (वर्तमान संस्थापन)बाट भनेर पर्खनेभन्दा पहल जहाँबाट हुन्छ, त्यहाँबाट गर्नुपर्छ,' खतिवडाले भने ।
उनले चुनावमा भएका गल्ती-कमजोरीको समीक्षा भएको समेत बताए ।
समानुपातिक सूची बुझाउँदा केही नमिलाइएको विषयमा समेत छलफल भएको खतिवडाले जानकारी दिए ।
