नेपाली कांग्रेसका सांसद भीष्मराज आङदेम्बेले जेनजी घटनाका सम्बन्धमा गठित जाँचबुझ आयोगको प्रतिवेदनका विषयमा प्रश्न उठाएका छन् ।

प्रतिनिधिसभाको पहिलो बैठकमा बिहीबार पार्टीका तर्फबाट सदनलाई सम्बोधन गर्दै आङदेम्बेले भदौ २३ को घटना मात्र छानबिन गरेर २४ को घटनालाई बेवास्ता गरिएको बताएका हुन् ।

‘कसैले २३ गतेको घटना देख्ने २४ को नदेख्ने । कसैले २४ को ध्वंस देख्ने, २३ को दमन नदेख्ने । यो प्रवृत्ति एकदम गलत छ । हुँदाहुँदा सरकारले बनाएको जाँचबुझ आयोगलेसम्म २३ गतेको घटनाको अनुसन्धान गर्‍यो, कारबाहीका लागि सिफारिस गर्‍यो‚’ उनले भने‚ ‘तर २४ को घटनाको अनुसन्धान गर्न भ्याइएन भन्यो । यो कस्तो तरिका हो ? पटकपटक समय थप्ने, तर समय पुगेन भन्ने यो कर्म जाँचबुझ आयोगमा रहेका व्यक्तिबाट नियतवश भएको होइन भनेर भन्न मिल्ने देखिन्न ।’

उनले २४ गते संसद् भवन खरानी भएको र त्यो खरानीलाई सम्झिएर कामना गर्दै भविष्यमा कोही खरानी बनाउनेतिर अगाडि नबढून् भन्ने पनि अनुरोध गरे । 

‘आज हामी जहाँ यो बैठक बसिरहेका छौं यो हाम्रो संसद् भवन होइन । हाम्रो संसद् भवन भदौ २४ गते खरानी भयो । यो बेला त्यो खरानीलाई सम्झौं, अनि संकल्प गरौं हामी यसरी काम गरौं ताकी भविष्यमा यो देशलाई खरानी बनाउन कोही अघि नसरून्‚’ उनले भने‚ ‘किन खरानी भयो संसद् भवन ? किन जल्यो सिंहदरबार ? किन ध्वस्त बनाइए अनेकौं भौतिक संरचना ? सभामुख महोदय म सरकारलाई ध्यानाकर्षण गराउन चाहन्छु भदौ २३ र २४ दुवै दिनका घटनालाई एकएक केलाउन जरुरी छ ।’

सांसद आङ्देबेले प्रधानमन्त्री बालेन शाहलाई ध्यानाकर्षण गराउँदै जाँचबुझ आयोगको प्रतिवेदन स्वयं सरकारले सार्वजनिक गर्ने कि सरकारले पनि गोरखापत्रमा पढ्ने ? भन्दै प्रश्न गरे । 

‘म आग्रह गर्न चाहन्छु- सरकारले सुझबुझपूर्ण ढंगले कानून र प्रक्रियाको मर्यादा राखेर आफूलाई प्रस्तुत गरोस् !कांग्रेस दोषी कोही उम्किनुहुन्न, निर्दोष कोही फस्नुहुन्न भन्ने मान्यता विगतदेखि नै बोक्दै आएको छ । यो मान्यतामा हामी आज पनि प्रस्ट र दृढ छौं‚’ उनले भने ।