अमेरिकी राष्ट्रपति डोनाल्ड ट्रम्पले इजरायल र इरानबीच चलिरहेको तनावका विषयमा ठूलो दाबी गरेका छन्।

'टाइम' पत्रिकासँग कुरा गर्दै ट्रम्पले आफूले आदेश दिए भने इजरायलले तुरुन्तै आफ्नो सैन्य आक्रमण बन्द गर्ने दाबी गरेका हुन् ।

उनले इजरायललाई एक भरपर्दो सहयोगी बताउँदै भने, 'जब म युद्ध रोक्न भन्छु, उनीहरू रोकिनेछन्।'

'टाइम्स अफ इजरायल'को रिपोर्ट अनुसार, इजरायली प्रधानमन्त्री बेन्जामिन नेतान्याहूका लागि अमेरिकाको समर्थन निकै महत्त्वपूर्ण छ र त्यसबिना उनीसँग धेरै विकल्पहरू छैनन् । अर्कोतर्फ, इरानी सेनाले भने आफ्ना शत्रुहरूले आत्मसमर्पण नगरेसम्म युद्ध जारी राख्ने अडान लिएको छ।

यसैबीच, समुद्रमा भइरहेको अवरोध हटाउन विश्वव्यापी प्रयास पनि शुरू भएको छ। संयुक्त राष्ट्र संघको सुरक्षा परिषद्मा आज शुक्रबार बहराइनले एउटा प्रस्ताव पेश गर्दैछ। यो प्रस्तावको मुख्य उद्देश्य 'होर्मुज जलडमरू'बाट व्यापारिक जहाजहरूलाई सुरक्षित रूपमा आउने-जाने वातावरण बनाउनु हो।

बहराइनका विदेशमन्त्रीका अनुसार विश्व बजारलाई जोगाउन र समुद्री व्यापारिक मार्गमा हुने अवरोध रोक्न यो कदम चालिएको हो।