०२ साउन २०८३, शनिबार
अमेरिकी राष्ट्रपति डोनाल्ड ट्रम्पले इरानसँगको अस्थायी युद्धविरामको अवधि बढाउने घोषणा गरेका छन्, जसले गर्दा मध्यस्थकर्ताहरूलाई अमेरिका र इरानबीच नयाँ चरणको आमनेसामने वार्ताको तयारी गर्न थप समय मिलेको छ। पाकिस्तानको अनुरोधमा यो कदम लिइएको उनले बताए।
ट्रम्पकाअनुसार, उनले अमेरिकी सेनालाई इरानमाथि नाकाबन्दी जारी राख्न र कुनै पनि परिस्थितिको लागि तयार रहन निर्देशनसमेत दिएका छन् । यसको अर्थ सैन्य दबाब रहनेछ, तर तुरुन्तै प्रत्यक्ष कारबाही गरिने छैन। अमेरिकाले इरानी बन्दरगाहहरूमा नाकाबन्दी भने जारी राख्ने छ।
इरानले समाधान प्रस्ताव नगरेसम्म र वार्ता पूरा नभएसम्म युद्धविराम जारी रहनेछ। त्यसपछि मात्र थप कारबाहीको निर्णय गरिनेछ।
ट्रम्पले इरानमा शासन परिवर्तन गरेको दोहोर्याए । अमेरिका र इरानबीच चाँडै नै ठूलो सम्झौता हुन सक्ने उनले दाबी गरे । वर्तमान परिस्थितिमा इरानसँग सम्झौतामा पुग्नुबाहेक अर्को विकल्प नभएको ट्रम्पले बताए ।
ट्रम्पले ट्रुथ सोसियलमा लेखेका छन्, 'इरानी सरकार अपेक्षा गरिएअनुसार आन्तरिक रूपमा विभाजित छ । पाकिस्तानका फिल्ड मार्शल असीम मुनीर र प्रधानमन्त्री शाहबाज शरीफले आफ्ना नेता र प्रतिनिधिहरूले साझा प्रस्ताव नआएसम्म इरानमाथिको आक्रमण रोक्न माग गरेका छन्। त्यसैले, मैले सेनालाई नाकाबन्दी कायम राख्न र अन्य मामिलाहरूको लागि पूर्ण रूपमा तयार रहन आदेश दिएको छु। परिणाम जे भए पनि, उनीहरूको प्रस्ताव प्रस्तुत नभएसम्म र वार्ता पूरा नभएसम्म युद्धविराम लम्ब्याइनेछ।'
शान्ति सम्झौता नभए अमेरिकी सेना आक्रमण गर्न पूर्ण रूपमा तयार रहेको बताए ।
ट्रम्पले युद्धविराम विस्तार गर्ने घोषणा गरे पनि इरानबाट कुनै आधिकारिक प्रतिक्रिया आएको छैन ।
यसअघि, इरानका विदेशमन्त्रीले अमेरिकी नाकाबन्दी युद्धको कार्य भएको र युद्धविरामको उल्लंघन भएको बताएका थिए ।
सभामुख मोहम्मद बागेर गालिबाफका वरिष्ठ सल्लाहकार महदी मोहम्मदीले ट्रम्पको घोषणालाई खारेज गर्दै भने, 'यसको कुनै अर्थ छैन।' गालिबाफले इस्लामाबादमा अमेरिकासँगको पहिलो चरणको वार्ताको नेतृत्व गरेका थिए र दोस्रो चरणको वार्तामा उपस्थित हुने अपेक्षा गरिएको थियो।
