२२ असार २०८३, सोमबार
‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
सरकारले समस्याग्रस्त सहकारीको बचतकर्ताको रकम जेठ पहिलो सातादेखि फिर्ता गर्ने भएको छ ।
गत वैशाख ९ गतेदेखि काम थालेको समस्याग्रस्त सहकारी व्यवस्थापन समितिले सहकारी र बचतकर्ताको आवश्यक विवरण सङ्कलन गरेर बचत रकम फिर्ता गर्ने तयारी गरेको हो ।
समितिले गरेको अध्ययनअनुसार समस्याग्रस्त सहकारीका करिब ७६ हजार बचतकर्ताको करिब रु ४६ अर्ब बचत फिर्ता गर्नुपर्ने छ । तीमध्ये अधिकांश साना बचतकर्ता रहेको समितिले जनाएको छ ।
००००
सरकारले निजामती सेवाभित्र क्रियाशील रहेका सबै ट्रेड युनियनहरू खारेज गर्दै सरकारी कार्यालयहरूमा रहेका युनियनका कार्यालयहरू तत्काल बन्द गर्न निर्देशन दिएको छ ।
सङ्घीय मामिला तथा सामान्य प्रशासन मन्त्रालयले एक परिपत्र जारी गर्दै सबै मन्त्रालय, विभाग, आयोग, सचिवालय र सरकारी निकायहरूलाई युनियनका गतिविधि रोक्न र उनीहरूले प्रयोग गर्दै आएका भौतिक संरचना फिर्ता लिन निर्देशन दिएको हो ।
००००
नेपाली कांग्रेसले सरकारले जारी गरेका अध्यादेश र संसदीय अभ्यासमाथि प्रहार भएको भन्दै संसदमा सशक्त भूमिका निर्वाह गर्ने निर्णय गरेको छ ।
पार्टी सभापति गगनकुमार थापाको सभापतित्वमा मंगलबार पार्टी केन्द्रीय कार्यालयमा बसेको संसद समन्वय बोर्डको बैठकले वर्तमान राजनीतिक परिस्थिति र संघीय संसदको आगामी अधिवेशनमा पार्टीको भूमिकालाई प्रभावकारी बनाउने निर्णय गरेको हो ।
००००
राष्ट्रिय स्वतन्त्र पार्टी (रास्वपा)ले पार्टी संगठन, संसदीय दल र सरकारबीचको सम्बन्धलाई थप सुदृढ, प्रभावकारी र नीतिगत रूपमा एकरूपता कायम गर्न १० सदस्यीय ‘पार्टी–संसद र सरकार समन्वय समिति’ गठन गरेको छ ।
पार्टीको हालै बसेको केन्द्रीय समितिको बैठकले महामन्त्री भूप देव शाहको संयोजकत्वमा उक्त समिति निर्माण गरेको हो ।
००००
राष्ट्रपति रामचन्द्र पौडेलले यही वैशाख २८ गतेका लागि सङ्घीय संसद्को दुवै सदनका अधिवेशन आह्वान गरेका छन् ।
उनले वैशाख २८ गते सोमबार दिउँसो २ बजे सङ्घीय संसद् भवन, सिहंदरबारमा बैठक बस्ने गरी दुवै सदनका अधिवेशन आह्वान गरेका राष्ट्रपतिको कार्यालयका प्रवक्ता रितेशकुमार शाक्यले एक विज्ञप्तिमार्फत् जानकारी दिए ।
००००
नेपाल उद्योग वाणिज्य महासंघको निर्वाचनपश्चात मतगणना भैरहेको छ । मंगलबार मतदान सकिएलगत्तै मतगणना शुरू भएको थियो ।
निर्वाचनमा अनजन श्रेष्ठ र हेमराज ढकालको प्यानबीच प्रतिस्पर्धा भइरहेको छ । अहिलेसम्म महासंघको वस्तुगततर्फ उपाध्यक्षमा नरेशलाल श्रेष्ठ निर्वाचित भएका छन् । हेमराज ढकाल प्यानलबाट विजयी भएका श्रेष्ठले ६३ मत प्राप्त गर्दै निर्वाचित भए । उनका अर्का प्रतिस्पर्धी शिवप्रसाद घिमिरेले ६० मत प्राप्त गरेका थिए ।
००००
पछिल्लो समय बैङ्क खाताबाट रकम चोरी हुने घटनामा वृद्धि हुँदै गएको भन्दै नेपाल प्रहरी साइबर ब्यूरोले सर्वसाधारणलाई उच्च सतर्कता अपनाउन आग्रह गरेको छ ।
ब्यूरोका प्रवक्ता एवं प्रहरी उपरीक्षक दिलीपकुमार गिरिले जारी गरेको प्रेस विज्ञप्तिमा अज्ञात तथा आपराधिक गिरोहहरूले मोबाइल प्रयोगकर्ताहरूलाई लक्षित गरी ठगी गर्ने नयाँ तरिका अपनाइरहेको उल्लेख गरिएको छ ।
००००
अर्थ मन्त्रालयले आन्तरिक राजस्व विभागको महानिर्देशकको जिम्मेवारी रमेश अर्याललाई दिएको छ ।
मन्त्रालयले विभागकै सहसचिव अर्याललाई मंगलबार महानिर्देशकमा नियुक्त गरेको हो ।
००००
काठमाडौं जिल्ला अदालतले नेपाल उद्योग वाणिज्य महासंघका पूर्व अध्यक्ष एवं गोल्छा समूहका अध्यक्ष शेखर गोल्छालाई हिरासतमा राख्ने म्याद थप्न अस्वीकार गरेको छ ।
बयान सकिएको हुनाले थुनाबाहिरै राखेर अनुसन्धान अगाडि बढाउन भन्दै जिल्ला अदालतले मंगलबार म्याद थप्न अस्वीकार गरेको हो ।
००००
अघिल्लो चार कारोबार दिन निरन्तर घटेको नेपाल स्टक एक्सचेन्ज (नेप्से) परिसूचकमा सामान्य अङ्कको सुधार देखिएको छ ।
मंगलबार नेप्से परिसूचक आठ दशमलव ७८ अङ्कले बढेर दुई हजार ७१२ दशमलव ८६ विन्दुमा कायम भएको हो ।
००००
संवैधानिक परिषद्को काम, कर्तव्य, अधिकार र कार्यविधि सम्बन्धमा सरकारले थप स्पष्ट पारिएको बुँदा थपेर पत्र पठाएपछि राष्ट्रपतिले अध्यादेश जारी गरेका छन् ।
आइतबार पुनर्विचारका लागि फिर्ता पठाइएको अध्यादेश राष्ट्रपति रामचन्द्र पौडेलले मंगलबार जारी गरेका हुन् ।
पुनर्विचारका लागि फिर्ता पठाउँदा राष्ट्रपति पौडेलले गरेको तर्क– ‘संविधान, लोकतन्त्र र बहुमतीय प्रणालीको मर्मसँग मेल नखाएको’ भन्ने थियो ।
सोमबार सरकारले अध्यादेशका विषयवस्तुमा पुनर्विचार नगरी जारी गर्न पुनस् राष्ट्रपतिलाई आग्रह गर्ने निर्णय र्गयो । प्रधानमन्त्री तथा मन्त्रिपरिषद्को कार्यालयले राष्ट्रपतिलाई पठाएको पत्रमा ‘थप स्पष्ट पारिएको’ भन्ने एउटा बुँदा थपिएको छ ।
स्रोतका अनुसार सरकारले राष्ट्रपति कार्यालयलाई पठाएको पत्रमा ‘संवैधानिक परिषद्को अध्यक्ष (प्रधानमन्त्री) अल्पमतमा पर्न नमिल्ने’ भन्ने उल्लेख छ ।
००००
स्मार्ट टेलिकम प्रालिका सर्वेश जोशी ठगी तथा आपराधिक विश्वासघात कसुरमा पक्राउ परेका छन् ।
नेपाल प्रहरीको केन्द्रीय अनुसन्धान ब्यूरोका अनुसार उनलाई बेइमानीपूर्वक नेपाल सरकारको हक टुटाउने उद्देश्यका साथ कार्य गरी गराई ठगी तथा आपराधिक विश्वासघात कसुर गरेकाले सोमबार पक्राउ गरिएको हो ।
००००
मालपोत कार्यालयको नाम परिवर्तन भएको छ । केही नेपाल ऐनलाई संशोधन गर्ने अध्यादेशले जग्गा प्रशासन सम्बन्धी काम गर्ने मालपोत कार्यालयको नाम परिवर्तन गरी भूमि प्रशासन कार्यालय राख्ने व्यवस्था गरेको हो।
