०४ साउन २०८३, सोमबार
नेकपा एमालेले पूर्वराष्ट्रपति विद्यादेवी भण्डारीको पार्टी सदस्यता नवीकरण गर्ने निर्णय गरेको छ ।
सोमबार एमाले अध्यक्ष केपी शर्मा ओलीको अस्थायी निवास गुन्डुमा बसेको सचिवालय बैठकले भण्डारीको पार्टी सदस्यता नवीकरण गर्ने निर्णय गरेको उपमहासचिव लेखराज भट्टले जानकारी दिए ।
राष्ट्रपति बन्नुअघि पनि भण्डारी एमालेको उपाध्यक्ष थिइन् । उनी पहिलोपटक २०७२ कात्तिक ११ मा राष्ट्रपति बनेकी थिइन् । त्यसपछि लगातार दोस्रो कार्यकालका लागि उनी फेरि २०७४ फागुन २९ गते राष्ट्रपतिमा निर्वाचित भएकी थिइन् ।
२०७९ फागुन २८ मा राष्ट्रपतिको कार्यकाल सकिएपछि भण्डारीले सक्रिय राजनीतिमा फर्किएको घोषणा गर्दै पुरानो पार्टी एमालेमा आफ्नो सदस्यता नवीकरण गराएको बताएकी थिइन् ।
तर, एमाले अध्यक्ष ओलीले २०८२ साउन ६ गतेको केन्द्रीय समिति बैठकबाट भण्डारीको पार्टी सदस्यता नवीकरण नगर्ने निर्णय गराएका थिए ।
केन्द्रीय कमिटीको निर्णयलाई चुनौती दिँदै भण्डारीले मदन भण्डारीले दिएको सदस्यता कसैले खोस्न नसक्ने बताएकी थिइन् ।
यद्यपि, एमाले अध्यक्षमा उठ्ने तयारी गरेकी भण्डारी केन्द्रीय समितिको निर्णयपछि २०८२ मंसिर २७ देखि पुस ३ सम्म भएको ११ औं महाधिवेशनमा सहभागी हुन पाइनन् ।
भण्डारी उठ्न नपाएपछि उनको समर्थनमा तत्कालीन वरिष्ठ उपाध्यक्ष ईश्वर पोखरेलले प्यानल बनाएर ओलीसँग अध्यक्षमा प्रतिस्पर्धा गरेका थिए । तर, उनी पराजित बन्न पुगे ।
सदस्यता रोकिएयता औपचारिक कार्यक्रममा नबोलाइएकी भण्डारीलाई एमालेले आइतबार मदन-आश्रित ३३औं स्मृति दिवसका अवसरमा प्रमुख अतिथि बनाएको थियो ।
