०४ साउन २०८३, सोमबार
भारतीय क्रिकेट टोली १२ वर्षपछि इङ्गल्यान्डसँगको टी–२० शृङ्खलामा पराजित भएको छ। ब्रिस्टलको काउन्टी ग्राउन्डमा खेलिएको चौथो टी–२० अन्तर्राष्ट्रिय खेलमा इङ्गल्यान्डले भारतलाई ९ विकेटको लज्जास्पद हार चखाएको हो ।
भारतले दिएको १५९ रनको लक्ष्य इङ्गल्यान्डले मात्र १३.५ ओभरमा १ विकेट गुमाएर सहजै पूरा गर्यो। यो जितसँगै ५ खेलको शृङ्खलामा इङ्गल्यान्डले ३–० को अजेय बढत लिँदै ट्रफी आफ्नो कब्जामा पारेको छ।
इङ्गल्यान्डले भारतविरुद्ध यसअघि सन् २०१४ मा टी–२० शृङ्खला जितेको थियो। अर्कोतर्फ, भारतीय टोलीले सन् २०१८–१९ पछि पहिलो पटक लगातार दोस्रो टी–२० शृङ्खला गुमाएको हो। यसअघि भारत आयरल्यान्डसँग २–० ले शृङ्खला हारेर आएको थियो।
टस जितेर पहिले ब्याटिङ रोजेको भारतको शुरूआत निकै खराब रह्यो। टोलीले ४८ रन जोड्दा आफ्ना शीर्ष ३ विकेट गुमाइसकेको थियो। त्यसपछि कप्तान श्रेयस अय्यरले एक साइड सम्हाल्दै ४९ बलमा ४ चौका र ५ छक्काको मद्दतले अविजित ८० रनको इनिङ खेले। तर, अन्य ब्याटरले उनलाई बलियो साथ दिन सकेनन्। भारतले निर्धारित २० ओभरमा ७ विकेट गुमाएर १५८ रन मात्र बनाउन सक्यो।
भारतका १५ वर्षीय युवा ब्याटर वैभव सूर्यवंशी यो खेलमा पनि ठुलो इनिङ खेल्न असफल रहे। उनी १० बलमा १५ रन बनाउँदै जोफ्रा आर्चरको बलमा आउट भए। तीन टी–२० अन्तर्राष्ट्रिय खेल खेलिसक्दा सूर्यवंशीको ब्याटबाट मात्र ४२ रन (पहिलो खेलमा १४, दोस्रोमा १३ र चौथोमा १५) निस्किएको छ।
अन्य ब्याटरहरूमा शिवम दुबेले २२, अभिषेक शर्माले १६, तिलक वर्माले ११, वासिङ्टन सुन्दरले ५, इशान किशनले ४ र अक्षर पटेलले १ रन मात्र जोडे। इङ्गल्यान्डका लागि जोफ्रा आर्चर र जोश टङले २–२ विकेट लिए भने विल ज्याक्स र आदिल रसिदले १–१ विकेट हात पारे।
१५९ रनको लक्ष्य पछ्याएको इङ्गल्यान्डको शुरूआत पनि कमजोर थियो। टोलीले १३ रनमै कप्तान जोस बटलर (८ रन) को रूपमा पहिलो विकेट गुमाएको थियो ।
तर, त्यसपछि क्रिजमा आएका ह्यारी ब्रुक र प्रारम्भिक ब्याटर फिल साल्टले भारतीय बलरहरूलाई कुनै मौका दिएनन्। यी दुईले दोस्रो विकेटका लागि मात्र ६८ बलमा १४६ रनको अविजित र विष्फोटक साझेदारी गर्दै खेललाई एकतर्फी बनाए।
ह्यारी ब्रुकले २२५.७१ को स्ट्राइक रेटमा ब्याटिङ गर्दै मात्र ३५ बलमा ८ चौका र ४ छक्काको मद्दतले अविजित ७९ रनको इनिङ खेले। त्यस्तै, फिल साल्टले ४२ बलमा ९ चौका र १ छक्का प्रहार गर्दै अविजित ५९ रन बनाए। इङ्गल्यान्डले ३७ बल बाँकी छँदै लक्ष्य भेटाएको थियो।
शृङ्खलाको पाँचौँ तथा अन्तिम टी–२० खेल जुलाई ११ मा साउथह्याम्पटनमा खेलिनेछ।
