भारतको हिमाचल प्रदेशस्थित ऊना जिल्लाको गगरेट क्षेत्रमा घटेको घटनाले यतिबेला धेरैको ध्यान तानेको छ। विवाहको मण्डपमा लगनगाँठो कसिएको केही घण्टामै एक नवविवाहित जोडीको सम्बन्ध टुङ्गिएको हो ।

दैनिक भास्करको समाचारअनुसार परम्परागत धार्मिक रीतिरिवाज र विधिपूर्वक दुवैको विवाह सम्पन्न भएको थियो। तर, विवाह सम्पन्न भएलगत्तै दुई परिवारबीच अचानक असमझदारी र मतभेदको स्थिति सिर्जना भयो ।

विवाद यतिसम्म बढ्यो कि विवाह सकिएपछि दुलहीले आफ्नो नयाँ घर (ससुराली) जान अस्वीकार गरिन् । दुलहीले घर जान नमानेपछि दुवै परिवारबीच निकैबेर भनाभन र छलफल भएको थियो । कुरा मिल्न नसकेपछि अन्ततः यो मामिला स्थानीय प्रहरी चौकीसम्म पुगेको समाचारमा उल्लेख छ । 

प्रहरीकै रोहबरमा दुवै पक्षका परिवार र आफन्तबीच लामो छलफल भएको थियो । दुवै पक्ष आ–आफ्नो अडानबाट पछि नहटेपछि अन्ततः कानुनी झमेला वा मुद्दामामिलामा नगई आपसी सहमतिमै अलग हुने निर्णयमा उनीहरू पुगेको समाचारमा उल्लेख छ । विवाह भएको केही घण्टामै बेहुला र बेहुलीले आपसी समझदारीमा वैवाहिक सम्बन्ध अन्त्य गर्ने सहमति पत्रमा हस्ताक्षर गरेर उनीहरू आ–आफ्नो बाटो लागेका हुन् ।