बिराटनगर, २८ चैत– एक नम्बर प्रदेशको प्रदेशसभा सदस्यहरुले शुन्य समयमा केही दिन अघि हिन्दु धर्मगुरु श्रीनिवासाचार्यमाथि भएको गोली प्रहारको घटनाको निन्दा गरेका छन् । प्रदेश सरकारले सुरक्षाको प्रत्याभूति गराउन नसकेको भन्दै सांसदहरुले तत्काल दोषि पत्ता लगाइ कडा कारबाही गर्न पनि माग गरेका छन् । उनीहरुले गोली प्रहार गरेको आरोपमा पक्राउ परेका दुईजनालाई सार्वजनिक गर्न समेत माग गरे ।
 
राप्रपाकी सांसद इन्दिरा राईले धर्मगुरुमाथिको आक्रमण र धार्मिक पर्वहरुको बिदा कटौतीले सनातन धर्म संकटमा परेको बताइन् । धर्मगुरुमाथिको आक्रमण गम्भीर विषय भएको भन्दै दोषीलाई छिटोभन्दा छिटो कारबाही गर्न राईले माग गरिन् । हिन्दु धार्मिक पर्वमा गरिएको बिदा कटौती फिर्ता लिन पनि उनले संघीय सरकारसँग माग गरिन् ।

नेपाली काँग्रेसकी सांसद शान्ता पौडेलले  धर्ममाथिको आक्रमण बन्द गर्न माग गरिन् । उनले धर्मगुरुमाथिको आक्रमणले सुरक्षा चुनौती बढाएको भन्दै सरकारको ध्यानाकर्षण गराइन् । त्यस्तै लिला सुब्बाले पनि धार्मिक सहिष्णुतालाई खलाल पर्ने गरी भएको आक्रमणको निन्दा गर्दै थप आक्रमणको खतराको बिषयमा सरकार संवेदनशिल बन्नु पर्ने बताइन् । 

त्यस्तै संदहरुले आफ्नो क्षेत्रको बिकास निर्माणको बिषय पनि उठान गरेका छन् । मोरङका सांसद राजकुमार ओझाले विराटनगर–विराटचौक जोड्ने सडक ४ लेनको बनाउनुपर्ने  माग राखे । संखुवासभाका एमाले सांसद तुलसी न्यौपानेले बसन्तपुर–मुढे–चैनपुर सडक निर्माणमा भएको अनियमितता छानविन गरी निर्माण कार्यलाई चाँडो सक्ने कार्यमा प्रदेश सरकारको ध्यानाकर्षण गराए ।

उनले सशस्त्र द्वन्द्वको क्रममा सरकारी कार्यालय आगजनी हुँदा कागजात जलेकोले संखुवासभाको जग्गाको तत्काल नापी गरेर नयाँ पुर्जा वितरण गर्न माग गरे । काँग्रेस सांसद लोकप्रसाद संग्रौलाले पूर्वाञ्चल विश्वविद्यालयको मेडिकल कलेज र सुविधायुक्त अस्पताल तत्काल सञ्चालन गर्न प्रदेश सरकारले पहल गर्नुपर्ने बताए । उनले प्रदेश सरकारले गैरकानुनी रुपमा बैज्ञानिक वन व्यवस्थापनमा रोक लगाउँदा सर्वसाधारण समस्यामा परेको भन्दै तत्काल त्यसलाई खुल्ला गर्न माग गरे । 

इलामका माओवादी सांसद धिरेन्द्र शर्माले इलामको सूर्याेदय नगरपालिकालाई पर्यटकीय नगरपालिकाको रुपमा घोषणा गर्नुपर्ने माग राख्दै बार्षिक ९ लाख पर्यटक आउने गरेकोमा ६ लाख सूर्योदय नगरपालिकाले धानेको बताए । किराँत धर्म गुरु आत्मानन्द लिङ्देनको जन्मस्थान इलामकै मांसेबुङ गाउँपालिकालाई धार्मिक पर्यटकीय क्षेत्र बनाउनुपर्ने उनको माग थियो । उनले चिया विकास बोर्ड प्रदेश माताहतमा ल्याउनु पर्ने माग राखे । 

संसदमा सरकारको जवाफ

संसदमा उठेका सवालको बारेमा जवाफ दिने अभ्यास पनि प्रदेश संसदले शुरु गरेको छ । जनताको सवालमा उठेका जिज्ञासालाई सम्बोधन गर्न सहजताको लागि सरकारलाई दवाद सिर्जना गर्नको लागि सरकारको जवाफ खोज्न थालिएको हो । यसअघि बसेको संसद बैठकको शुन्य समयमा प्रदेश सांसदहरुले उठाएका विभिन्न सवालमा सरकारको तर्फबाट बुधबारको बैठकमा आन्तरिक मामिला तथा कानुनमन्त्री हिक्मत कार्कीले जवाफ दिएका थिए । 

मन्त्री कार्कीले सांसदहरुले उठाएका समस्या समाधानको लागि प्रदेश सरकारले आफ्नो भूमिका खेल्ने र संघीय सरकारको मातहतका काम सम्पन्न गर्न पहल गर्नेमा जोड दिनु भएको थियो । 

हुलाकी राजमार्गको काम छिटो अगाडि बढाउन संघीय सरकारसँग पहल गर्ने र प्रदेश सरकारले कामको अनुगमन गर्ने जानकारी दिँदै मन्त्री कार्कीले अबैध सुरपारीको कारोबार नियन्त्रण प्रदेश सरकारको प्राथमिकतामा परेको बताए । बाढी–पहिरोपीडितको राहत र पुनस्र्थापनाका लागि पनि सम्बन्धित जिल्ला र स्थानीय तहसँग समन्वय गरेर काम गर्ने उनको भनाइ थियो । 

मन्त्री कार्कीले प्रत्येक सांसदले यसअघिको बैठकमा उठाएका सवालबारे सबै संसदहरुको सवालको जवाफ दिएका थिए । 

समितिले पूर्णता पायो

आजै बसेको संसद बैठकले बिभिन्न बिषयगत समितिहरुलाई पूर्णता दिएको छ । शुसासन तथा योजना समिति, अर्थ समिति, सार्बजनिक लेखा समिति, सामाजिक विकास समिति, उद्योग पर्यटन तथा वातावरण समिति, प्राकृति श्रोत तथा पूर्वाधार समिति लगायतमा सदस्य छनौट गर्दै समितिलाई पूर्णता दिइएको हो ।