काठमाडौं – संघीय संरचनाअनुसार स्वास्थ्य तथा जनसंख्या मन्त्रालयमा गत साउनदेखि लागू भएको नयाँ संरचनामा परिमार्जन हुने भएको छ । नयाँ संरचनामा जाँदा केही समस्या देखिएपछि मन्त्रालयले त्यसलाई परिमार्जन गर्ने तयारी गरेको हो ।

गत साउन १ गतेबाट नयाँ संरचना लागू गरे पनि कर्मचारीको दरवन्दीमा समस्या उत्पन्न भएपछि मन्त्रालयले संरचना परिवर्तन गर्न पहल थालेको हो । 

यसअघि मन्त्रालयमा पटक–पटक छलफल गरी नयाँ संरचना पारित भएको थियो । छलफलमा निर्णय भएअनुसार संरचना नबनाइएको आरोप कर्मचारीहरूको छ ।

नयाँ संरचनामा स्वास्थ्य मन्त्रालयका ११औं तहका ८ जना तथा अधिकृत र अन्य कर्मचारी कामविहीन छन् ।

स्वास्थ्यको नयाँ संरचना कार्यान्वयन गर्दा जनतालाई आधारभूत स्वास्थ्य सेवा दिन कठिनाइ हुने भन्दै उपप्रधान तथा स्वास्थ्यमन्त्री उपेन्द्र यादवले मन्त्रालयमा आन्तरिक छलफल गरेका थिए ।

संविधानले स्वास्थ्यलाई मौलिक हकमा समेटेको छ । नयाँ संरचनाले जनतालाई आधारभूत स्वास्थ्य सेवा उपलब्ध गराउन कठिनाइ हुने मन्त्रालयकै कर्मचारीहरू बताउँन् । 

नयाँ संरचनामा विवाद देखिएपछि मन्त्रालयले संरचना पुनरावलोकनका लागि समिति नै बनाएको छ ।

मन्त्रालयले जनसंख्या व्यवस्थापन तथा स्वास्थ्य समन्वय प्रमुख विशेषज्ञ डा. सुशीलनाथ प्याकुरेलको संयोजकत्वमा ७ सदस्यीय समिति बनाएको छ ।

संघीय संरचनामा मन्त्रालय अन्तर्गतका महाशाखा, विभाग, केन्द्र लगायतका संगठन संरचनाको पुनरावलोकन गरी परिमार्जन आवश्यक भएमा राय पेश गर्न उक्त समितिलाई जिम्मेवारी दिइएको छ । संघीयाता अनुसार लागु भएको संरचना अपूर्ण देखिएको समितिका संयोजक डा. प्याकुरेलले बताए ।

‘संविधान अनुसार जनतालाई आधारभूत स्वास्थ्य सेवा उपलब्ध गराउन स्थानीय तहसम्म स्वास्थ्यकर्मी पुर्‍याउन स्वास्थ्यकर्मीको संख्या बढाउनुपर्ने अवस्था छ, तर नयाँ संरचनामा त झनै कम भयो,’ समितिका संयोजक डा. प्याकुरेलले लोकान्तरसँग भने, ‘त्यो संरचना पूर्ण छैन । त्यसैले परिमार्जन गर्न आवश्यक छ ।’ 

समितिले भदौ मसान्तसम्ममा संरचनाको पुनरावलोकन गरी प्रतिवेदन तयार गर्दैछ । समितिले तयार पारेको प्रतिवेदनअनुसार छलफल गरी मन्त्रालयले स्वास्थ्यको संरचना परिवर्तन गर्न लागेको छ ।