धनगढी - टीकापुर घटनाको अभियोगमा जेल जीवन बिताइरहेका व्यक्तिहरुको सहयोगार्थ मुठी दान अभियान सुरु गरिएको छ ।

थरुहट÷थारुवान राष्ट्रिय मोर्चा जिल्ला संयोजन समिति कैलालीले मंगलबारदेखि सो अभियानको थालनी गरेको हो । धनगढी उपमहानगरपालिका–१९ फूलवारी घर भएका मोर्चाका केन्द्रीय संयोजक लक्ष्मण थारुको घरबाट अभियानको थालनी गरिएको छ ।

संयोजक थारुका दाजु नयन चौधरीले १ क्वीन्टल धानबाफत हुन आउने २ हजार रुपैया गाउँका भलमन्सा (गाउँ प्रमुख) लबरु चौधरीलाई हस्तान्तरण गरेर अभियानको थालनी गरेका हुन् । पहिचानको अधिकारको लडाईको क्रममा अझै ११ जना जेल जीवन भोगिरहेको बताउँदै संयोजक थारुले हालसम्म कानूनी लडाईको क्रममा अदालतमा मात्रै ४० लाख खर्च भैसकेको जानकारी गराए ।

जिल्ला अदालत कैलालीमा थुुनछेकको बहसको क्रममा मात्रै १० लाख खर्च भएको उल्लेख गर्दै उनले हालसम्मको कानूनी लडाइ र जेलबन्दीको परिवारजनको जिविकोपार्जनमा व्यक्तिगत तथा केही सहयोगी पक्षको सहयोग धानेको बताए ।

तर त्यतिले सम्भव नभएपछि र गत भदौ ७ र ८ गते टीकापुरमा सम्पन्न राष्ट्रिय सम्मेलनबाट जारी टीकापुर घोषणापत्रमा उल्लेख भए अनुसार राजबन्दी परिवारहरुको सहयोगार्थ मुठी दान सुरु गरेको स्पष्ट पारे । अभियान देशभर सञ्चालन गर्ने बताउँदै उनले संकलित रकम राजबन्दी परिवारको जिविकोपार्जन तथा बालबालिकाहरुको शिक्षादीक्षामा खर्च गरिने जानकारी दिए ।

यसैबीच मोर्चाका कैलाली संयोजक माधव थारुले गाउँ–गाउँमा भलमन्साहरुको अगुवाइमा अभियान सुरु गरेको जानकारी दिए । संकलित जिन्सी तथा नगद रकम पारदर्शी ढंगले खर्च गर्ने बताउँदै उनले संकलित रकम मोर्चाको केन्द्रीय खाता जम्मा गर्ने र उदेश्य मुताविक खर्च हुने दाबी गरे । यसैबीच मार्चाका केन्द्रीय संयोजक थारुले आफुहरुको थरुहट मुद्धा कायमै रहेको बताए ।

अखण्ड सुदूरपश्चिममा नबस्ने बताउँदै उनले संविधान बनिसकेपछि अब कानूनी तथा संवैधानिक रुपमै अधिकारको लडाइ लड्ने बताए । राजनीतिक अधिकारको लागि छिट्टै ढंगको अभियानको थालनीको सुरुवात समेत गरिरहेको उद्घोष गरे ।

२०७२ भदौ ७ गते टीकापुरमा थरुहट आन्दोलनका क्रममा ८ प्रहरीसहित १ नाबालकको ज्यान गएको थियो । सो घटनामा २७ जना विरुद्ध मुद्धा दायर भएको थियो । २०७५ फागुन २२ गते जिल्ला अदालत कैलालीले ३ जनालाई सफाइ दिने फैसाला ग¥र्यो । सोही फैसाला अनुसार थरुहट नेता लक्ष्मण थारुसहित १२ जना ३ वर्ष जेल भुुक्तान गरि जेल मुक्त भएका छन् । भने रेशमलाल चौधरीसहित ११ जना अजीवन जेल जीवन भोगिरहेका छन् । हाल सो मुुद्धा उच्च अदालत दीपायलमा विचाराधिन छ ।