काठमाडौं – भारतको सर्वोच्च अदालतले शनिवार राम मन्दिर निर्माणको पक्षमा फैसला दिएपछि मन्दिर निर्माण कहिलेसम्म होला भन्ने जिज्ञासा धेरैले राखेका छन् ।

विश्व हिन्दू परिषद्ले ३० वर्षअघि नै गुजरातका आर्किटेक्ट चन्द्रकान्त भाई सोमपुरालाई राम मन्दिरको नमूना तयार पार्न लगाएको थियो । चन्द्रकान्तले मन्दिर निर्माणको काम ५० प्रतिशत पूरा भइसकेको बताएका छन् । 

दुई हजार कालीगढले दिनको १० घन्टा काम गरेमा साढे दुई वर्षमा मन्दिर निर्माण पूरा गर्ने उनको भनाइ छ ।

चन्द्रकान्तका हजुरबुवाले गुजरातमा सोमनाथ मन्दिर निर्माण गरेका थिए । सोमपुरा परिवार पुस्तौंदेखि मन्दिर निर्माण कार्यमा खटिएको छ । 

चन्द्रकान्तले भने, ‘हाम्रो काम हेरेर नै ३० वर्षअघि परिषद्ले हामीसँग सम्पर्क गरेको थियो । अशोक सिंघलले हामीलाई मन्दिरको नमूना बनाउन भनेका थिए । त्यतिखेरै नमूना बनाइयो अनि चट्टान मिलाउने काम गर्न थालियो । मन्दिरको डिजाइन तयार पार्न ६ महिना लाग्यो । हामीले ६ पटक भिन्न भिन्न डिजाइन तयार पार्‍यौं । त्यसपछि सिंघल र उनको टोलीलाई नागर शैलीले बनेको डिजाइन मन पर्‍यो ।’

उनले भने, ‘भारतमा मन्दिर तीनवटा शैलीमा बन्ने गरेका छन् ः नागर, द्रविड र बैसर । राम मन्दिर नागर शैलीमा बनाइनेछ । उत्तर भारतमा यसकै प्रचलन छ । यस शैलीका मन्दिरको विशेषता भनेको आधारदेखि शिखरसम्म चतुष्कोणीय हुन्छ । राम मन्दिरको डिजाइन विशेष छ । यसको परिक्रममा वृत्ताकार हुन्छ भने गर्भगृह अष्टकोणीय हुन्छ । दुईतल्ले मन्दिरमा भुइँतल्लामा मन्दिर र माथिल्लो तल्लामा रामदरबार हुन्छ । त्यसका खम्बाहरूमा देवीदेवताका आकृति बनाइनेछन् । गुम्बदको काम पूरा भएको छैन, समय लाग्नेछ ।’

राम मन्दिरमा फलाम उपयोग गरिने छैन । निर्माणमा लगभग १०० करोड भारु खर्च लाग्नेछ । मन्दिरको चौडाइ १५० फीट, लम्बाइ २७० फीट र गुम्बदसम्मको उचाइ २७० फीट हुनेछ । 

एजेन्सी