अब सिमेन्टमा लेमिनेटेड बोरा प्रयोग नगरे कारबाही

नेपालमा उत्पादन तथा बिक्री हुने सिमेन्टमा लेमिनेटेड बोरा प्रयोग गर्नुपर्ने सात वर्षअघिको विवाद पुनः ब्युँतिएको छ । उद्योग विभागले सात वर्षअघि सरकारले गरेको व्यवस्था कार्यान्वयमा ल्याउन सिमेन्टमा अनिवार्य लेमिनेटेड बोरा प्रयोग गर्नुपर्ने सूचना जारी गरेपछि विवाद ब्युँतिएको हो । 

सर्वोच्च अदालतको फैसला र उद्योग, वाणिज्य तथा आपूर्ति मन्त्रालयको निर्देशनअनुसार सिमेन्टमा लेमिनेटेड बोरा प्रयोग गर्नुपर्ने व्यवस्थालाई प्रभावकारी रूपमा कार्यान्वयनमा ल्याउन थालिएको उद्योग विभागका महानिर्देशक जीवनप्रकाश सिटौलालले बताए । सोहीअनुसार विभागले नेपालमा उत्पादन तथा बिक्री–वितरण हुने सबैखाले सिमेन्ट अनिवार्य रूपमा लेमिनेटेड बोरा प्रयोग गर्न सूचनासमेत जारी गरिसकेको उनले बताए । 


Advertisement

१५ जेठ ०६९ मा सरकारले राजपत्रमा सूचना प्रकाशित गर्दै सिमेन्टमा लेमिनेटेड बोरा प्रयोग गर्नुपर्ने व्यवस्था गरेको थियो । उद्योग विभागले सोही सूचना १ असार ०६९ मा दैनिक पत्रिकामा प्रकाशित गरी ९० दिनभित्र लेमिनेटेड बोरा प्रयोगमा ल्याउन सूचित गरेको थियो । तर, उद्योगी डा. ताराप्रसाद पोखरेलले उद्योगीहरूका तर्फबाट उक्त सूचना खारेज गरिपाऊँ भनी सर्वोच्च अदालतमा रिट हालेका थिए ।


Advertisement

सर्वोच्चले १८ भदौ ०६९ मा उक्त सूचना कार्यान्वयन नगरी–नगराई यथावत् राख्नु भनी अन्तरिम आदेश जारी गरेको थियो । त्यसको सात वर्षपछि सर्वोच्चले गत ३ वैशाख ०७६ मा अन्तरिम आदेश निष्क्रिय गरी रिट निवेदन खारेज ग-यो । सर्वोच्चको आदेशपछि उद्योग वाणिज्य तथा आपूर्ति मन्त्रालयले सिमेन्टमा लेमिनेटेड बोरा प्रयोग गर्ने व्यवस्था कार्यान्वयन गर्न निर्देशन दिँदै विभागलाई पत्राचार ग-यो । ‘सर्वोच्चको अन्तिम फैसला र मन्त्रालयको पत्रअनुसार हामीले यस व्यवस्थालाई कार्यान्वयनमा लगेका हौँ,’ उनले भने, ‘अब नेपालमा बिक्री–वितरण हुने सबैखाले सिमेन्टमा लेमिनेटेड बोरा प्रयोग गर्नैपर्छ ।’ नयाँ पत्रिकामा खबर छ ।

कमेन्ट गर्नुहोस्