बुटवल- गुल्मीको रुरु क्षेत्र गाउँपालिका ६ को उपनिर्वाचनमा शान्तिपूर्ण रूपमा मतदान शुरू भएको छ ।

बिहान ७ बजेबाटनै मतदान शुरू भएको जिल्ला निर्वाचन अधिकृत राजेन्द्र पोखरेलले बताए । निर्वाचनको लागि एक मतदान केन्द्र र दुई मतदान स्थल तोकिएको छ । अहिलेसम्म दुई मतदान स्थलमा ५ सय ६५ मत खसेको निर्वाचन अधिकृत कृष्ण शरण लामिछानेले बताए ।

निर्वाचनका लागि दुई जना मतदान अधिकृत, चार जना सहायक मतदान अधिकृत, आठ स्वयमसेवक र दुई जना सहयोगी गरी १४ जना कर्मचारी मतदान स्थलमा खटिएका छन् ।

महिला, पुरुष र अशक्तहरूको छुट्टाछुट्टै लाइनको व्यवस्था गरिएको मतदाताले बिहान ७ बजेबाट बेलुकी ५ बजेसम्म मतदान गर्न पाउने छन् । मतदान पश्चात मतपेटीका मुख्य निर्वाचन अधिकृतको कार्यालय रुरु क्षेत्र गाउँपालिका ४ बलेटक्सारमा पुर्‍याएपछि बेलुकीबाटै मतगणना हुने जिल्ला निर्वाचन कार्यालय गुल्मीले जनाएको छ ।  

त्यस्तै निर्वाचनको लागि सुरक्षा व्यवस्था कडा पारिएको छ । प्रमुख जिल्ला अधिकारी कोशहरी निरौलाका अनुसार मतदान स्थलको सुरक्षाको लागि नेपाल प्रहरी, सशस्त्र प्रहरी र नेपाली सेना खटिएका छन् । ढुक्क भएर मतदानमा प्रक्रियामा सहभागी हुन मतदातालाई निरौलाले आग्रह गरे । 

रुरु क्षेत्र गाउँपालिका ६ रिमुवामा ०७४ को स्थानीय तहको निर्वाचनमा तत्कालीन नेकपा एमालेबाट निर्वाचित वडा अध्यक्ष पुर्ण बहादुर रेग्मीको निधन भएपछि उपनिर्वाचन भएको हो ।

वडाअध्यक्ष पदका लागि तीन जना उम्मेदवार चुनावी मैदानमा छन् । सत्तारुढ नेपाल कम्युनिष्ट पार्टी (नेकपा) ले गिरीप्रसाद सिंजाली र नेपाली काँग्रेसबाट बेदप्रसाद दर्लामी तथा स्वतन्त्र तर्फबाट मनबहादुर दर्लामीले उमेद्धवारी दर्ता गरेका थिए। तीन जना उमेदवारनै मतदान स्थलमा उपस्थित थिए । वडा न ६ को लागि दुई हजार ४८ मतदाता रहेको जिल्ला निर्वाचन कार्यालय गुल्मीले जनाएको छ ।