भूमि व्यवस्था, सहकारी तथा गरिबी निवारण तथा सहकारीमन्त्री पदमाकुमारी अर्यालले नेपालको अर्थतन्त्रमा सहकारी क्षेत्रले खेलेको भूमिकाको चर्चा गर्दै प्रत्येक घरलाई सहकारीको सदस्य बनाउनुपर्ने बताएकी छन् ।

नेपाल बहुउद्देश्यीय केन्द्रीय सहकारी संघ लिमिटेडको बिहीवार सम्पन्न आठौं स्थापना दिवस र सातौं वार्षिक साधारणसभामा उनले भनिन्, ‘तपाईंहरूले दुःख आन्दोलन गरेर प्राप्त गरेको उपलब्धिलाई जोगाउन सबै सहकारीकर्मी एकजुट हुनुको विकल्प छैन, त्यसैले नियमअनुसार अघि बढ्नुस् ।’

अन्तर सहकारी भुक्तानी प्रणालीको शुरूआत गर्न आग्रह गर्दै मन्त्री अर्यालले त्यसो भए मात्र सहकारी संस्थाको थप विकास हुने बताइन् । राम्रो कारोवार गर्ने सहकारीको वार्षिक विवरण सार्वजनिक गर्नुुपर्ने धारणा राख्दै उनले सबै सदस्यलाई आकर्षण गर्न कूल पूँजीको निश्चित रकम कोषमा राख्नुपर्ने बताइन् । 

नेपाल बहुउद्देश्यीय केन्द्रीय सहकारी संघ लिमिटेडका अध्यक्ष सुरेन्द्र भण्डारीले २५ अर्बभन्दा बढीको पूँजी परिचालन भएको बहुउद्देश्यीय सहकारी संघसंस्थाको दीर्घकालीन विकास गर्न संस्थागत सुशासन अपरिहार्य रहेको बताउँदै त्यसलाई प्रभावकारी रुपमा कार्यान्वयन गर्दै अघि बढेको जानकारी गराए ।

देशभरका ४ हजार ३७१ बहुउद्देश्यीय सहकारी संस्थामध्ये केन्द्रीय संघअन्तर्गत १२ संघसहित ३३४ संघसंस्था संघमा आबद्ध छन् । संघअन्तर्गत करीब ४५ हजारलाई रोजगारी दिइएको संघको भनाइ छ । 

अध्यक्ष भण्डारीले २ करोड रुपैयाँ चुक्ता पूँजी रहेको संघको करीब ५० करोड रुपैयाँ सम्पत्ति, ४७ करोड निक्षेप, १७ करोड रुपैयाँ लगानी रहेको जानकारी गराउँदै चालू आवबाट संघ नाफामा गएको जानकारी गराए ।