गत चैत्र २९ गते गोरखा दरबारबाट शुरू भएको नेपाली सेनाको गोरखा–जीतगढी पदयात्रा शुक्रवार रुपन्देहीको बुटवलस्थित जीतगढीमा पुगेर टुंगिएको छ । पदयात्रामा सहभागी टोलीलाई समापन समारोहस्थल जीतगढीमा भव्य स्वागत गरिएको सेनाले जनाएको छ ।

सहभागी फौजले नेपालको राष्ट्रिय झण्डा, नेपाली सेनाका आरम्भकालीन ५ वटा स्थायी कम्पनी तथा जीतगढी लडाइँमा सहभागी गुरुबक्स गुल्मको झण्डासहित पदयात्रा गरेको थियो ।

गोरखा दरबारदेखि जीतगढीसम्म करिब २०७ किलोमिटर दूरीमा सञ्चालित पदयात्रा गोरखा, तनहुँ, स्याङ्जा, पाल्पा हुँदै नवौँ दिनमा जीतगढीमा पुगेको थियो ।

त्यसपछि स्थानीय झाँकीलगायत विविध कार्यक्रमसहित जीतगढी विजय उत्सव मनाइएको सेनाको जनसम्पर्क तथा सूचना निर्देशनालयले जारी गरेको विज्ञप्तिमा उल्लेख छ ।

‘सो अवसरमा कार्यक्रमका लुम्बिनी प्रदेशका प्रदेश प्रमुख अमिक शेरचनले पदायात्रामा सहभागी फौज तथा आम सर्वसाधारणलाई मायाको चिनो प्रदान गर्नुका साथै इतिहासविद्हरूलाई सम्मानपत्र तथा उत्कृष्ट झाँकीलाई पुरस्कृत गर्नुभएको थियो,’ विज्ञप्तिमा भनिएको छ ।

जीतगढी विसं १८७१–७२ मा भएको नेपाल–अंग्रेज युद्धमा कर्णेल उजिरसिंह थापाको नेतृत्वमा नेपाली फौजले वीरताका साथ युद्ध गरी विजय हासिल गरेको ऐतिहासिक स्थल हो ।

जीतगढी विजय उत्सव तथा पदयात्रा समापन कार्यक्रम बुटवल उपमहानगरपालिका प्रमुख (मेयर) खेलराज पाण्डेयको अध्यक्षतामा सञ्चालन भएको थियो । 

सेनाको विज्ञप्तिः