नाबालिका विद्यार्थीको चरित्र हत्या गरेको आरोपमा शिक्षक पक्राउ

नाबालिका विद्यार्थीको चरित्र हत्या गरेको आरोपमा एक निजी विद्यालयका शिक्षकलाई प्रहरीले पक्राउ गरेको छ ।

भक्तपुर नगरपालिका–४ काहालान्च घर भएका २८ वर्षीय युवकलाई प्रहरीको साइबर ब्यूरोले पक्राउ गरेको हो । ब्यूरोले उनको परिचय खुलाएको छैन ।

ब्यूरोका प्रवक्ता एसपी दीपकराज अवस्थीका अनुसार उनले नक्कली फेसबूक आईडी बनाएर अश्लील तस्वीरमा नाबालिका विद्यार्थीको फोटो जोडेर स्टाटस राख्दै आएका थिए ।​​

नाबालिकाका अभिभावकले ब्यूरोमा उजुरी दिएपछि प्राविधिक विश्लेषण गर्दा शिक्षकको कर्तुत खुलेको थियो ।

प्रहरीले ती शिक्षकविरुद्ध विद्युतीय कारोबार ऐन, २०६३ अन्तर्गतको कसुरमा काठमाडौं जिल्ला अदालतमा अभियोग दर्ता गरी अनुसन्धानको लागि पाँच दिनको म्याद लिएको छ ।