काठमाडौं– विवादमा तानिएपछि गायक दुर्गेश थापाले 'ह्याप्पी तिहार' बोलको गीत युट्युबबाट हटाएका छन् ।

उक्त गीतमा बीयर र गाँजाको प्रचार गरेको भन्दै उनको चर्को आलोचना भएको थियो ।

गाँजाको प्रचार गर्नु कानूनी रूपमा समेत गलत भएको भन्दै उजुरी परेपछि प्रहरीले उनलाई पक्राउ समेत गरिसकेको छ ।

थापालाई मंगलवार बालाजुबाट पक्राउ गरिएको महानगरीय प्रहरी अपराध महाशाखाका प्रमुख एसएसपी सहकूल थापाले जानकारी दिए ।

थापा पक्राउ परेको केहीबेरमा युट्युब चेक गर्दा उक्त भिडियो हटाइसकेको पाइयो ।

उक्त भिडियोको लिंकमा जाँदा 'दिस भिडियो इज प्राइभेट' भन्ने मेसेज देख्न सकिन्छ । 

भिडियोलाई कसैले हेर्न नमिल्ने गरी दुर्गेशले प्राइभेटमा राखेका छन् ।

यद्यपि उनको आधिकारिक च्यानलबाट डाउनलोड गरेर राखिएका भिडियोहरू भने युट्युबमा भेट्न सकिन्छ ।