हनुमानजीको आशीर्वादले दिल्ली विधानसभा चुनाव जितेको बताउने आम आदमी पार्टी (आप)का नेता अरविन्द केजरीवालले चुनाव सकिएपछि पनि हनुमानजीलाई याद गरिरहेका छन् । 

आप विधायक सौरभ भारद्वाजले हरेक महिनाको पहिलो मंगलवार दिल्लीका फरक फरक ठाउँमा सुन्दरकाण्ड पाठ गराउने जानकारी दिए । 

भारद्वाजले सुन्दरकाण्डका लागि निमन्त्रण पत्र छपाएका छन् । आज मंगलवार अपराह्न साढे ४ बजे प्राचीन शिव मन्दिर चिराग दिल्लीमा सुन्दरकाण्ड पाठ आयोजना गरिने भएको छ । 

राजधानी दिल्लीमा आपले तेस्रोपटक सरकार बनाएको हो । प्रचण्ड बहुमतका साथ आप सत्तामा फर्किएको हो । चुनावमा अनेकौं मुद्दा थिए तर हनुमानजीको चर्चा सबभन्दा बढी रह्यो । 

दिल्लीमा यसपालि आपले ७० मा ६२ सीटमा विजय हासिल गरेको छ । माघ २५ गते मतदानको दिन केजरीवालले हनुमान चालीसा पाठ गरेका थिए र त्यसअघि हनुमान मन्दिर पनि गएका थिए ।