मोफसलको प्रतिष्ठित क्लब सहारा क्लब पोखराले बिहीबारदेखि पोखरा रंगशालामा १८औं आहा रारा गोल्डकप फूटबल प्रतियोगिता आयोजना गर्दैछ । 

१० टीम सहभागी उक्त प्रतियोगिताको उद्घाटन खेलमा आयोजक सहारा र ब्रिगेड ब्वाइजबीच प्रतिस्पर्धा हुने मंगलबार आयोजित पत्रकार सम्मेलनमा जनाइयो ।

निर्माणाधीन पोखरा रंगशालामा फागुन २२ देखि चैत १ सम्म हुने सो प्रतियोगितामा साविक विजेता रुस्लान थ्रीस्टार क्लब, त्रिभुवन आर्मी क्लब, नेपाल आयाल निगम मनाङ मर्स्याङ्दी क्लब, नेपाल पुलिस क्लब, नेपाल एपीएफ क्लब, संकटा क्लब, झापा–११ फूटबल क्लब, भारतको गान्तोक सिटी फूटबल क्लब समेत प्रतिष्पर्धामा छन् । लिगविजेता मच्छिन्द्र क्लबको भने सहभागिता छैन ।
 
यसपालि पुरस्कार राशिमा वृद्धि गरिएको छ । विजेताले १० लाख १ हजार र उपविजेताले ५ लाख १ हजार रुपैयाँ पाउने आयोजकले जनाएको छ ।

गत संस्करण तुलनामा विजेताको लागि २ लाख र उपविजेताका लागि १ लाख रुपैयाँ पुरस्कार वृद्धि गरिएको हो । 

समयक्रम अनुसार यसपालि पुरस्कार राशि बढाइएको प्रतियोगिता मूल आयोजक समिति संयोजक एवं क्लबका अध्यक्ष केशवबहादुर थापाले जानकारी दिए । 

प्रतियोगिताबाट १ करोड १८ लाख रुपैयाँ आम्दानी र ९९ लाख ३८ हजार रुपैयाँ खर्च हुने आयोजकको अनुमान छ । 

यस्तै, सर्वोत्कृष्ट राष्ट्रिय फूटबल खेलाडी सम्मानबाट सुजल श्रेष्ठलाई नगद ३५ हजार सहित सम्मान गरिनेछ । 

मुख्य प्रायोजक हिमश्री फुड्स प्रालिका कार्यकारी अध्यक्ष सूर्यबहादुर केसीले आफ्नो विरासतपछि पनि छोराहरूले फूटबल विकासमा सहयोग गर्ने उद्घोष गरे । 

२०५५ सालमा पोखरामा स्थापित मोफसलको चर्चित सहारा क्लब फूटबलमार्फत सामाजिक सेवामा सक्रिय रहँदै आएको छ ।

क्लबले सहारा एकेडेमी सञ्चालन गरी हाल तेस्रो ब्याचको रूपमा १४ जिल्लाका २४ बालकलाई फूटबल प्रशिक्षणसहित आवासीय सुविधा एवं शिक्षादिक्षा प्रदान गरिरहेको छ ।

प्रतियोगितालाई शुरूको संस्करणदेखि हिमश्री फुड्स प्रालिको उत्पादन आहा तथा रारा चाउचाउले मुख्य प्रायोजन गर्दैआएको क्लब महासचिव रामजीप्रसाद अधिकारीले जानकारी दिए । 

१७ औं संस्करणको विजेता रुस्लान थ्रीस्टार र उपविजेता त्रिभुवन आर्मी हो ।