भारतमा जारी इन्डियन प्रिमियर लिग (आईपीएल) क्रिकेटमा कोलकाता नाइट राइडर्सले दिल्ली क्यापिटल्समाथि जीत दर्ता गरेको छ । 

सोमबार राति घरेलु मैदान इडेन गार्डेनमा भएको खेलमा उत्कृष्ट फर्ममा रहेको कोलकाताले दिल्लीमाथि ७ विकेटको शानदार जीत दर्ता गरेको हो ।

पराजित हुँदा दिल्लीलाई प्ले अफको सम्भावना भने कठिन हुँदै गएको छ । जारी प्रतियोगितामा कोलकाता १२ अंकसहित तालिकाको दोस्रो स्थानमा छ भने दिल्ली १० अंकसहित छैटौं स्थानमा पुगेको छ ।

पहिले ब्याटिङ गर्न आएको दिल्लीले निर्धारित ओभरमा ९ विकेट गुमाएर जम्मा १५३ रन बनाएको थियो ।

दिल्लीका कप्तान ऋषभ पन्तले टस जितेर पहिले ब्याटिङ गर्ने निर्णय गरेका थिए  । दिल्लीको शीर्ष क्रम पूर्ण रूपमा फ्लप साबित भयो । पृथ्वी साले १३ रन, ज्याक फ्रेजरले १२ रन बनाए भने अभिषेक पोरेल १८ रन बनाएर आउट भए । 

शाई होपले दोहोरो अंक पार गर्न पनि सफल भएनन् । कप्तान पन्तले जिम्मेवारी सम्हाल्न खोजे पनि २७ रनको स्कोरमा वरुण चक्रवर्तीले उनलाई आउट गरे । पन्तले एक छक्का र दुई चौका प्रहार गर्दा २० बल सामना गरेका थिए ।

दिल्लीका लागि ९ नम्बरमा ब्याटिङ गर्न आएका कुलदीप यादवले इज्जत जोगाए । कुलदीप टोलीका लागि सर्वाधिक रन बनाउने ब्याट्सम्यान साबित भए । उनले २६ बलमा ५ चौका र १ छक्का प्रहार गर्दै ३५ रनको उत्कृष्ट पारी खेले । कुलदीपको पारीका आधारमा टोलीले १५३ रन जोड्न सफल भयो । कोलकाताका लागि वरुण चक्रवर्तीले ३ विकेट लिए । वैभव अरोरा र हर्षित रानाले २–२ विकेट हात पारे । यसबाहेक स्टार्क र सुनिल नारायणले पनि १–१ विकेट लिए ।

एक सय ५४ रनको सामान्य लक्ष्य पछ्याउँदा कोलकाताले शानदार सुरुवात गरेको थियो । ओपनर फिल साल्टले आफ्नो आँधीले बलरलाई ध्वस्त पारे । उनले ३३ बलमा ७ चौका र ५ छक्का प्रहार गर्दै ६८ रनको खेल विजयी पारी खेले । 

साल्टको विकेटपछि कप्तान श्रेयस अय्यर र वेंकटेश अय्यर अन्तिमसम्म नटआउट रहेपछि ७ विकेटको सहज जित निस्कियो । दिल्लीका अक्षर पटेलले २ तथा लिजाड विलियम्सले एक विकेट लिए । 

आईपीएलमा आज राति लखनऊ सुपर जायन्ट्स र मुम्बई इन्डियन्स भिड्ने छन् ।