इन्डियन प्रिमियर लिग (आईपीएल)मा कोलकाता नाइट राइडर्सले लखनउ सुपर जायन्ट्सविरुद्ध शानदार जीत हासिल गरेको छ । आइतबार राति सम्पन्न खेलमा केकेआरले लखनउलाई ९८ रनले हराएको हो । 

जितसँगै केकेआर अंक तालिकाको शीर्ष स्थानमा उक्लिएको छ । ११ खेलबाट कोलकाताको १६ अंक छ । टोली नेट रनरेटको आधारमा राजस्थान रोयल्सलाई उछिन्दै कोलकाता शीर्ष स्थानमा उक्लिएको हो । लखनउ भने १२ अंकसहित पाँचौँ स्थानमा छ ।

कोलकाताले दिएको २३६ रनको विशाल लक्ष्य पछ्याउने क्रममा लखनउ १६.१ ओभरमा १३७ रनमै अलआउट भयो । मार्कस स्टोइनिसले सर्वाधिक ३६ रनको योगदान दिए । कप्तान केएल राहुलले २५ रन तथा एस्टन टर्नरले १६ रन तथा आयुश बदोनीले १५ रन र निकोलस पुरनले १० रन बनाए । अन्य ब्याटरले दोहोरो अङ्कमा समेत रन जोड्न सकेनन् । 
केकेआरका हर्षित राना र वरुण चक्रवर्तीले ३–३ विकेट लिए भने आन्द्रे रसलले २ तथा सुनिल नरेन र मिचेल स्टार्कले १–१ विकेट हात पारे ।

यसअघि पहिले ब्याटिङ गरेको कोलकाताले निर्धारित २० ओभरमा ६ विकेटको क्षतिमा २ सय ३५ रन बनाएको थियो । कोलकाताका लागि प्लेयर अफ द म्याच घोषित सुनिल नरेनले ३९ बलमा ८१ रनको विस्फोटक इनिङ्स खेलेका थिए ।