भारतका प्रधानमन्त्री नरेन्द्र मोदीले मंगलवार मध्यरातदेखि लागू हुनेगरी राष्ट्रव्यापी बन्दाबन्दी (लकडाउन) को घोषणा गरेपछि सामान किन्नका लागि मानिसहरूले भीडभाड गरेका छन् । 

कोरोनाभाइरसको संक्रमण फैलिन नदिनका लागि २१ दिनसम्म बन्दाबन्दीको घोषणा गरिएको हो । 

‘तपाईंहरूलाई घरबाट निस्कन पूर्ण प्रतिबन्ध लगाइएको छ,’ मोदीले टेलिभिजनबाट सम्बोधन गर्दै भने । 

उनले मानिसहरूलाई नआत्तिनका लागि आग्रह गरे पनि भीड पसलहरूमा पुगेको थियो । 

बन्दाबन्दी गरिएपछि अब मानिसहरूलाई कसरी अत्यावश्यक सामानको जोहो गराउने हो भन्ने स्पष्ट छैन । 

भारतमा केही दिनयता कोरोना संक्रमण ह्वात्तै बढेपछि कठोर उपाय अपनाइएको हो । भारत ५६२ जनामा कोरोना संक्रमण पुष्टि भइसकेको छ भने ११ जनाको मृत्यु भएको छ । 

अन्य देशले पनि कोरोना फैलिन नदिनका लागि बन्दाबन्दीको घोषणा गरेका छन् ।