चीनको वुहानमा अधिकारीहरूले तीव्र गतिका रेलवे स्टेसनहरूलाई संक्रमणमुक्त बनाउनका लागि रसायन छर्न थालेका छन् । 

वुहानमा लगाइएको यात्रा प्रतिबन्ध हटाउने तयारी सरकारले गर्दै गर्दा यसरी रसायन छरिएको हो । कोरोनाभाइरस फैलिएपछि वुहानमा जनवरी महिनादेखि बन्दाबन्दी (लकडाउन) गरिएको छ । 

उद्धार अधिकारी र अग्निनियन्त्रकहरूले गगल र हाज्मात सुट लगाएर हान्कोउ रेलवे स्टेसन र वुहान रेलवे स्टेसनलाई संक्रमणमुक्त बनाउन रसायन छर्केका हुन् । 

महामारी रोक्नका लागि यी दुवै स्टेसन बन्द गरिएको दुई महिनाभन्दा बढी भइसकेको छ । 

एक करोड १० लाख मानिस बस्ने वुहान शहरबाट नै कोरोनाभाइरसको महाव्याधि शुरू भएको हो । 

आठ हप्तासम्म कठोर उपाय अपनाएपछि वुहानमा नयाँ संक्रमितको संख्या स्वाट्टै घटेको छ । मार्च १९ देखि २३ सम्म लगातार पाँच दिन त्यहाँ नयाँ केसहरू देखिएनन् । 

अधिकारीहरूले वुहानको बन्दाबन्दीलाई अप्रिल ८ मा हटाउने तयारी गरिरहेका छन् भने मंगलवार मध्यरातबाट हुबेई प्रान्तका अन्य भागमा लगाइएको यात्रा प्रतिबन्ध हटाइसकिएको छ ।