नेपाल स्वास्थ्य अनुसन्धान परिषद्ले कोभिड–१९ को उपचारमा आयुर्वेदिक औषधि पनि प्रयोग गर्न सकिन्छ कि भनेर अध्ययन गर्न थालेको छ। 

परिषद्का कार्यकारी प्रमुख डा प्रदीप ज्ञवालीले आयुर्वेदिक औषधिले पनि कोभिड–१९ को उपचार गर्न सकिन्छ भनेर आयुर्वेदिक औषधिसँग सम्बन्धित जडिबुटी र वनस्पतिको पनि अध्ययन गरिरहेको बताए। 

उनका अनुसार बेसार, गुर्जो, वनतोरीलगायत खाद्यान्न र वनस्पतिमा अनुसन्धान गरेर कोरोना भाइरसको उपचार गर्न सकिन्छ कि भनेर अध्ययन गर्न थालिएको छ।  यसैगरी परिषद्ले प्लाज्मा टान्सफ्युजन’ गरेर गर्ने पद्धतिबारे अनुसन्धान गर्ने तयारी गरेको छ। कोभिड–१९ का सङ्क्रमितबाट स्वस्थ्य भइसकेको व्यक्तिबाट रगतमा भएको प्लाज्मा झिकेर सङ्क्रमित बिरामीमा राखेर गरिने उपचार पद्धति हो। 

अहिले यो पद्धतिबारे वैज्ञानिकले अनुसन्धान गरेर अपनाउन सकिने बताएका छन् । अहिले मन्त्रालयले ‘प्लाज्मा टान्सफ्युजन’ बारे कार्यविधि बनाइरहेको छ । परिषद्का कार्यकारी प्रमुख डा ज्ञवालीले कार्यविधि बनेपछि ‘प्लाज्मा टान्सफ्युजन’ बारे अनुसन्धान गरिने जानकारी दिए।