लद्दाखको गलवान उपत्यकामा हिंस्रक भिडन्त भएपछि भारत र चीनबीच तनावको स्थिति छ । 

वास्तविक नियन्त्रण रेखामा तनाव घटाउन नयाँ दिल्ली र बेइजिङका तर्फबाट सैन्य तथा कूटनीतिक प्रयास जारी छन् । 

यसैबीच चीनले वास्तविक नियन्त्रण रेखा आसपासका क्षेत्रमा सैन्य उपस्थिति बढाएको छ । भारतका तीन राज्य अरुणाचल प्रदेश, सिक्किम र उत्तराखण्डमा चिनियाँ जनमुक्ति सेनाका सैनिकहरूको आवागमन बढिरहेको छ । 

भारतीय समाचार संस्था पीटीआईका अनुसार, लद्दाखको पांगोङ त्सो, गलवान उपत्यका र हट स्प्रिङमा पनि चीनले सैनिकहरूको संख्या बढाएको छ । भारतले विरोध गरेको भए पनि पोइन्ट १४ को क्षेत्रमा चीनले पुनः संरचना बनाएको छ । 

अन्य तीन राज्यमा रहेको वास्तविक नियन्त्रण रेखामा जनमुक्ति सेनाले जवानहरूका साथै गोलीबारुद र हतियार बढाएको छ । 

दुई देशबीच तनाव कम गर्नका लागि भारतको विदेश मन्त्रालयका सहसचिव नवीन श्रीवास्तव र चीनको परराष्ट्र मन्त्रालयका वू जियाङाओबीच बुधवार वार्ता भएको थियो । त्यसका साथै दुवै देशका सैन्य कमान्डरले पनि कुराकानी गरिरहेका छन् । सोमवार भारतको १४ कोर्प्सका कमान्डर लेफ्टिनेन्ट जनरल हरिन्दर सिंह र तिब्बत मिलिटरी डिस्ट्रिक्टका कमान्डर मेजर जनरल लियू लिनबीच ११ घन्टासम्म निरन्तर कुराकानी भएको थियो ।