पर्यटकीय नगरी पोखरामा बिहीवारदेखि सार्वजनिक यातायातका साधन चल्न थालेका छन् ।

४ महिना लामो लकडाउनपछि बिहीवार बिहानदेखि बस गुड्न थालेका छन् ।

पोखरा महानगरमा कोरोना भाइरसविरुद्ध आवश्यक मापदण्ड अपनाउँदै विभिन्न यातायात कम्पनीमार्फत कूल संख्याका आधाजसो नगर बस चलाउन थालिएको हो ।

अविरल वर्षाबीच पनि सडकमा हरिया र नीला रंगका नगरबस देखेपछि यात्रु पनि दंग छन् । उनीहरू आवश्यक मापदण्ड अपनाउँदै सेवा लिन आतुर छन् । गाडी चढ्न थालेपछि लामो गन्तव्य हिँडेरै पार गर्न बाध्य यात्रुलाई पनि सहज भएको छ ।

भुवन गुरुङ ग१ख ३८८६ नम्बर बसका चालक हुन् । बिहीवार बिहान ६ बजे बेलाघारीदेखि उनको गाडी छुट्यो । पोखरा–१७ बेलघारीदेखि पोखरा–११ फूलबारीस्थित मणिपाल रुट चल्ने सो बसमा यात्रु भने पातलो संख्यामा चढे ।

चालक गुरुङले भने, ‘मान्छे त छैनन् । बेलघारीदेखि मणिपाल पुगेर बिरौटा फर्किंदासम्म ४ जना मात्र यात्रु चढे । पानी पनि आ’को छ । कम्पनीले चलाउन भनेपछि सेवा त दिनैपर्‍यो ।’

ग१ख ६७८४ नम्बरको बसका चालक बलराम श्रेष्ठले आवश्यक सुरक्षा मापदण्ड अपनाएको दाबी गरे । उनले भने, ‘सरकारले भनेअनुसार ग्लोब्स लगाउने, मास्क लगाउने काम गरेका छौं । यात्रुलाई पनि मास्क लगाउन र स्यानिटाइजर लगाउन सुझाव दिने गरेका छौं ।’

पोखरा–१ बगरदेखि पोखरा–१७ छोरेपाटन रुट चल्ने सो बस ४ महिनापछि मात्र यात्रुको सेवाका निम्ति यसरी देखा परेको हो । गाडीको कूल सिट क्षमता ३० जनासम्म रहे पनि अहिलेको मापदण्ड अनुसार १४ जनासम्म मात्र चढ्न मिल्छ तर बगरदेखि छोरेपाटन आइपुग्दा उनको गाडीमा १ जना मात्र यात्रु चढे ।

ती यात्रु हुन् भलामका श्याम पौडेल । पोखरा नदीपुरदेखि रत्नचोकसम्म जान भनी गाडी चढेका पौडेलले यात्रुलाई दिएको सेवाप्रति कृतघ्न रहेको सुनाए । आफूहरूले सोचेजस्तै सुरक्षा मापदण्ड बसले अपनाएको उनको भनाइ थियो । उनलाई ४ महिना लामो लकडाउनपछि पहिलो पटक नगर बस चढ्दा नौलो अनुभव भएको रहेछ । मुखमा मास्कसहित हातमा ग्लोब्स समेत लगाएका उनले भने, ‘कोरोना भाइरस मुलुकबाट नहटिसकेकोले सबैले ख्याल गर्नुपर्छ ।’

सहचालक राजु श्रेष्ठले सुरक्षा मापदण्डबारे यात्रुलाई पनि सम्झाउने गरेको बताए । यात्रुले मास्क लगाउनुपर्ने, चढ्नुअघि सेनिटाइजर प्रयोग गर्नुपर्ने, सिटमा १ जना मात्र बस्ने, सकेसम्म खुद्रा पैसा ल्याउनुपर्ने उनको सुझाव छ ।

बस चढ्नुअघि अनिवार्य मास्क प्रयोग गर्नुपर्ने, भाडाका लागि सकेसम्म खुद्रा पैसा लिनुपर्ने, कम्तीमा १–१ मिटर दूरीमा रहेर सिटमा १ जना मात्र बस्नुपर्ने लगायत मापदण्ड स्वास्थ्य सुरक्षाको निम्ति अपनाउन भनिएको छ । सोबारे सूचना गाडीको भित्तामै स्पष्टसँग टाँसिएको देख्न पाइन्छ ।

गाडीका चालक र सहचालक दुवैले पनि अनिवार्य मास्क प्रयोग गर्नुपर्ने, ग्लोब्स लगाउनुपर्ने, यात्रुको लागि स्यानिटाइजर स्पष्ट देख्ने ठाउँमा राख्नुपर्ने, सिट प्लानअनुरुप यात्रु चढाउनुपर्ने, बस स्टपमा मात्र रोक्नुपर्ने लगायत नियम तोकिएको छ ।