प्रहरीलाई नै रन्थन्याउने गोंगबु हत्याकाण्ड : यसरी खुल्यो पर्दा पछाडि लुकाउन खोजिएको रहस्य

गगन अर्याल
गगन अर्याल

लोकान्तर संवाददाता अर्याल सुरक्षा/अपराध तथा समसामयिक विषयमा समेत कलम चलाउँछन् ।

आइतवार बिहान ७ बजे सुटकेशबाट रगत बगेको भन्दै प्रहरीलाई सूचना आयो । त्यसपछि प्रहरी घटनास्थल टोखा नगरपालिका–१० गोंगबुस्थित नवज्योति मार्गतर्फ लाग्यो ।

प्रहरीले घटनास्थलमा कालो सुटकेशबाट रगत बगिरहेको देख्यो, त्यसलाई खोलेर हेर्दा टाउको विनाको शव फेला पर्‍यो । 


Advertisement

प्रहरीले बाँकी शरीरको भाग खोज्न ‘जोजो’ नामक तालिम प्राप्त कुकुर परिचालन गर्‍यो । केही समयमै सुटकेश भेटिएको लगभग ३०० मिटर टाढा रातो जेब्रा झोलामा टाउको र खुट्टा फेला पार्‍यो । 

शरीरका टुक्रा फेला परे पनि विभत्स हत्याकाण्डको कारण र हत्याराबारे प्रहरी अनभिज्ञ थियो । हत्या गरेर कसले फालेको हो ? किन हत्या गरिएको हो ? यी कुरा पत्ता लगाउन प्रहरीलाई हम्मेहम्मे पर्‍यो ।


Advertisement

केही विकल्प नभएर रन्थनिएको प्रहरीले सोमवार मारिएका व्यक्तिको फोटो सार्वजनिक गरेर चिन्ने मानिसले सम्पर्क गर्न अनुरोध गर्‍यो । महानगरीय प्रहरी परिसर काठमाडौं र महानगरीय अपराध महाशाखाको टोलीले अनुसन्धान गरिरहेको थियो ।

प्रहरीले तस्वीर सार्वजनिक गरेको केही घण्टामै हत्या भएका व्यक्तिको पहिचान खुल्यो । मारिएका व्यक्तिका मामाले महानगरीय प्रहरी वृत्त चक्रपथमा मृतक भान्जा भएको र उनी दाङका कृष्णबहादुर बोहोरा भएको जानकारी दिए ।

प्रहरीले मृतकको परिचय बताउने मामासँग नै कृष्णबहादुरको फोन नम्बर मागेर अनुसन्धान शुरू गर्‍यो । बोहोराको फोनमा सम्पर्क भएका व्यक्तिको अनुसन्धान गर्दा हत्या गरेकी महिलाको पहिचान भयो । त्यसपछि प्रहरीले कल्पना मुडभरी (पौडेल) लाई चितवनबाट पक्राउ गरेर काठमाडौं ल्यायो, घटनाको सबै रहस्य खुल्यो ।

किन भयो हत्या ?

मृतक कृष्णबहादुर बोहोरा र कल्पना मुडभरीबीच ३–४ वर्षअघि सामाजिक सञ्जाल फेसबूकमार्फत चिनजान भएको थियो । कृष्ण समय–समयमा कल्पनाको कोठामा आइरहन्थे । केही टेलीशृंखलामा खेल्दै आएकी कल्पना र बोहोराबीच चिनजान हुँदा बोहरा विदेशमा थिए ।

बोहोराले कल्पनाको फोटो राखेर फेसबूक आईडी खोलेर चलाउँदै आएका थिए । आफूले भनेको अनुसार चल्न भनेर बोहोराले कल्पनालाई दबाब दिँदै आएको अनुसन्धानमा खुलेको प्रहरीले जनाएको छ ।

शनिवार राति मृतक बोहोरा आफू बस्दै आएको बसपार्कको होटलबाट बा७२प ५६४४ नम्बरको स्कुटीमा कल्पनाको कोठामा आएका थिए । कोठामा आएपछि कल्पनाले बोहोरालाई दही, चिउरा, मासु, र भोड्का खुवाइन् । कल्पनाले दहीमा निद्रा लाग्ने औषधि (सिल्पिङ ट्याब्लेट) राखेर लठ्ठ पारेको प्रहरी अनुसन्धानमा खुलेको मंगलवार आयोजित पत्रकार सम्मेलनमा प्रहरीले जानकारी दिएको छ ।

बोहरालाई लठ्ठ पारेपछि कल्पनाले हतौडाले अण्डकोषमा हानेको र सलले घाँटीमा थिचेर हत्या गरेको बयानबाट खुलेको प्रहरीले जनाएको छ । हत्या गरेपछि बोहोराको शवलाई टुक्रा–टुक्रा पारेर फालिएको थियो । 

शवका टुक्रा फालेपछि चिनजानका व्यक्तिको एम्बुलेन्समार्फत आइतवार बिहानै कल्पना चितवनको कालिका नगरपालिका–७ घर गएर बसेकी थिइन् ।

प्रारम्भिक अनुसन्धानबाट कल्पना र कुष्णबहादुरबीच शारीरिक सम्बन्ध तथा लेनदेन हुने गरेको खुल्न आएको प्रहरीले जनाएको छ ।

प्रहरीले घटनास्थलबाट हिर्काउन प्रयोग भएको हतौडा, रगत लत्पतिएको पञ्जा, म्याट्रेसको टुक्रा, घाँटी कस्न प्रयोग गरेको कालो रंगको सल, सुटकेशको ह्याण्डल, नाम्लोमा प्रयोग भएको डोरीको टुक्रा, मृतकले लगाएका तथा झोलामा रहेका मृतकका कपडाहरू, स्लिपिङ ट्याब्लेटको खोल, मोबाइल सेटहरू बरामद गरेको छ ।

गगन अर्याल
गगन अर्याल

लेखकबाट थप...

कमेन्ट गर्नुहोस्