रुसको परराष्ट्र मन्त्रालयमा पहिलो महिला प्रवक्ताका रूपमा मारिया जाखारोभाले पाँच वर्ष बिताइसकेकी छन् । उनले कडा बोलीका कारण अन्तर्राष्ट्रिय स्तरमा ख्याति कमाएकी छन् । 

दिनहुँ गरिने पत्रकार सम्मेलनमा जाखारोभाले नघुमाइकन कुरा राख्ने गरेकी छन् । 

उनलाई बीबीसीले संसारका शीर्ष १०० प्रेरणादायी तथा प्रभावशाली महिलाको सूचीमा राखेको छ । उनले प्रेस रूम बाहिरको जीवन पनि संसारलाई देखाएकी छन् । सन् २०१६ मा रुस–आसियान शिखर सम्मेलनमा गण्यमान्य

व्यक्तिहरूका अगाडि परम्परागत कालिन्का लोकनृत्य प्रस्तुत गरेकी थिइन् र त्यसको भिडियो संसारलाई देखाउन उनी धक मान्दिनन् । 

रुसको परराष्ट्रनीतिका चासोका विषयको प्रतिरक्षा गर्दा उनी कुरा चपाउँदिनन् । सिरिया, युक्रेन, स्क्रिपाल घटना र कुख्यात रसियागेटका विषयमा उनी स्पष्ट धारणा राख्छिन् । 

सन् २०१६ को फेब्रुअरी महिनामा अमेरिकाको परराष्ट्र मन्त्रालयका उपप्रवक्ता मार्क टोनरले सिरिया शान्ति सम्झौताका विषयमा रुसलाई स्वीकार गर्न वा चुप लाग्न भनेका थिए । त्यस्तो गैरकूटनीतिक भाषा प्रयोग गरेकोमा

जाखारोभाले कडा जवाफ फर्काउँदै ‘तिमीहरूको कूटनीतिक सञ्चार यस्तै किसिमको हुन्छ भने आफ्नै सहकर्मीलाई चुप लाग्न भन’ मार्क भनेकी थिइन् । 

अमेरिकाको मूलधारे सञ्चारमाध्यमलाई झूटो खबर नफैलाउन उनले सीधै भनेकी छन् । 
 

जाखारोभालाई कवितामा पनि रुचि छ । सन् २०१६ को मे महिनामा एक पत्रकार सम्मेलनका क्रममा उनले कवितालाई कूटनीतिक साधन बनाउँदै रोबर्ट बर्न्सको कवितालाई अलिक तोडमरोड गरेर प्रस्तुत गरेकी थिइन् । 

जस्तालाई त्यस्तै जवाफ फर्काउनुका अतिरिक्त जाखारोभाले कलात्मक नृत्य समेत प्रस्तुत गर्ने गरेकी छन् । सन् २०१८ को अगस्ट महिनामा सर्बियामा भएको ५८औं ब्रास ब्यान्ड फेस्टिभलमा उनले बाल्कन संगीतमा कम्मर हल्लाएको भिडियो चर्चित बनेको थियो । 

त्यसको एक वर्षपछि उनले ककेसिया क्षेत्रको परम्परागत नृत्य लेजगिन्का उत्तरी ककेसस क्षेत्रमा प्रस्तुत गरेकी थिइन् ।