काठमाडौं महानगरपालिका–१६ स्थित बालाजु चोक नजिकै रहेको जनमैत्री अस्पताल अगाडि एउटा रिक्सामा पल्टिएका मजदुर कालेलाई राखेर अर्का मजदुर श्याम उभिएका थिए ।

बालाजुमै मजदुरी गर्ने रिक्सा चालक कालेका साथी श्याम जनमैत्री अस्पताल अगाडि सहयोगको अपेक्षामा उभिएका थिए ।

शुक्रवार साँझ पैसा नभएर अस्पताल लैजान नसकेका उनले बिहान पैसा सरसापट गरेर नजिकैको मेडिकल लगेका थिए । तर मेडिकलले कोभिडको बिरामी भएको भन्दै अस्पताल लैजान भनेपछि श्यामले कालेलाई रिक्सामै बोकेर जनमैत्री अस्पताल ल्याएका थिए ।

पैसा नभएका कारण कालेले २–३ दिनदेखि खाना खान नपाएको श्यामले जानकारी दिए । ‘साँझदेखि बिरामी छ । खै के भएको थाहा छैन,’ श्यामले लोकान्तरसँग भने, ‘कालेलाई मेडिकलले अस्पताल लैजा भनेर यहाँ लिएर आएको हुँ ।’

‘ऊसँग पैसा थिएन, मसँग पनि थिएन, कोरोनाले सबै ठप्प भयो । साँझ अस्पताल लैजान सकेनौं,’ श्यामले थपे, ‘अस्पतालले हामी लिँदैनौं भन्छ, कहाँ लग्ने ?’

अस्पतालले पनि कोरोनाको बिरामी नभएको भन्दै अर्काे अस्पतालमा लैजानु भनेपछि श्याम कसैले सहयोग गर्छ कि भन्ने आशमा थिए ।

तर कोरोना भाइरसको संक्रमणको डरका कारण कोही पनि सहयोग गर्न र नजिक आएनन् । 

सडक छेउमा रिक्सामा पल्टिएको साथीलाई घरको छतबाट हेर्ने र छिटो अस्पताल लैजानू भन्ने धेरै थिए तर सहयोग गर्न कोही तयार देखिएनन् ।

कोरोना संक्रमण भए/नभएको यकिन पुष्टि भएको थिएन । केहीबेरमा ‘प्रेस’ लेखेको पहेंलो ज्याकेट लगाएका ३–४ जना क्यामेरा बोकेर आए, घटनाक्रम भिडियोमा रेकर्ड गरेर गए ।

केही समयमा एउटा पीकअप गाडी आयो । ‘हाम्रो टीम नेपाल’को टोलीले उनलाई लिएर गयो । 

दोलखाको चरिकोट घर भएका काले (बोलाउने नाम) ५–७ वर्षदेखि बालाजुमा रिक्सा चलाएर गुजारा गर्दै आएका उनका साथी श्यामले बताए । 

महामारीको समयमा सँगै बस्दै आएका साथीलाई सहयोग गर्न नपाउँदा आफैंलाई दुःख लागेको उनले बताए । बालाजु क्षेत्रमा कालेका आफन्त र नातेदार कोही पनि सम्पर्कमा छैनन् ।

‘हाम्रो टीम नेपाल’ले कालेलाई उपचारका लागि कहाँ लिएर गयो भनेर श्यामलाई पत्तो छैन ।