ललितपुर, १८ जेठ– ललितपुर प्युटारका ९ बर्षीय करण तामाङ अपरिचित व्यक्तिको एसिड आक्रमणमा परेका छन् । एसिड आक्रमणबाट घाइते भएका करण अहिले टिचिङ अस्पतालमा उपचाररत छन् ।

करणको मुखभित्र एसिड परेका कारण उनको जिब्रो र मुख सुन्निएको छ । उनी अहिले बोल्न सक्ने अवस्थामा छैनन् ।


केवल इशाराका भरमा मात्रै कुरा गर्न सक्छन् । करण ललितपुर प्युटारस्थित श्री कालीदेवी माध्यामिक विद्यालयको २ कक्षामा अध्ययन गर्छन् ।

जेठ ८ गते स्कूलबाट फर्केर घरआएपछि साथीहरुसँग बाहिर निस्केका करणलाई तीन अपरिचित व्यक्तिले मुखमा एसिड हालेको उनका दाई किरण तामाङले बताए ।

‘कसले मुखमा हालिदिएको भन्ने प्रश्नमा करणले हातले मात्रै इशारा गर्न सक्छन्, उनी बोल्न सक्ने अवस्थामा छैनन् । उनको जिब्रो सुन्निएर बाहिर निस्केको छ’ दाई किरणले लोकान्तरसँग भने ।

आफूभन्दा ठूला दुई व्यक्तिले समाएको र एकले मुखमा एसिड हालिदिएको आक्रमण लगत्तै उनले आफ्नी आमा कान्छीमाया तामाङलाई बताएका थिए ।

एसिड मुखमा परेपछि करणको मुख पुरै सुन्निएको थियो, दुइटै आँखा रातो थियो र बोल्न सक्ने अवस्था नरहेको उनकी आमा कान्छीमायाले बताइन् ।

बच्चाको त्यस्तो अवस्था देखेपछि कान्छीमाया र बुबा अष्टबहादुरले तत्कालै टीकाभैरबको स्वास्थ्य चौकीमा लगेका थिए । त्यहाँ उपचार सम्भव नभएपछि उनीहरु ललितपुरको पाटनअस्पताल हुँदै महाराजगन्जको कान्तिबाल अस्पताल पुगे । त्यहाँ पनि उपचारसम्भव नभएपछि अहिले उनको टिचिङ अस्पतालमा उपचार भइरहेको छ ।

जेठ ८ गते टिचिङ भर्ना भएका करणको उपचार शुरु गरेको ११ दिन भइसकेको छ र उनी अझै बोल्न सक्ने अवस्थामा छैनन् । करणको मुखमा हालेको एसिड घाँटीसम्म पुग्न नपाएका कारण उनको स्वास्थ्य जटिल नभएको उपचारमा संलग्न चिकित्सकहरुले बताए ।

‘एसिड घाँटीबाट तल नझरेका कारण अबस्था जटिल हुन पाएन’ उपचारमा संलग्न डा. देवकी खड्काले लोकान्तरसँग भनिन् ।


घटनाको बारेमा प्युटारको प्रहरीलाई खबर गरिसकेको उनका पिता अष्टबहादुरले बताए । तर पनि बच्चा बोल्न सक्ने अवस्था नरहेको भन्दै एसिड मुखमा हाल्ने व्यक्तिको प्रहरीले पहिचान गर्न सकेको छैन ।

जिल्ला प्रहरी कार्यालय ललितपुरले भने घटनाको समबन्धमा अनभिज्ञता प्रकट गरेको छ ।

परिवारका सदस्यले आफूहरुको कसैसंग रिसिइवी नभएको बताएका छन् । न्युन आर्थिक अबस्थाका तामाङ परिवार अहिले छोरोको उपचार खर्च अभावमा तड्पिएको छ । ‘दुई हजार रुपैयाँ लिएर आएका थियौं, त्यो पनि सकियो’ आमा कान्छीमायाले लोकान्तरसँग भनिन्, ‘खर्च अभावले उपचार रोकिने हो कि भनेर चिन्तित छौ ।’

---

---