गण्डकी प्रदेशकी प्रदेश प्रमुख सीताकुमारी पौडेलले नयाँ सरकार गठनका लागि दाबी पेश गर्न दलहरूलाई २४ घण्टाको समय दिएकी छन् ।

संविधानको धारा १६८ (५) बमोजिम सरकार गठनका लागि दाबी पेश गर्न समय दिइएको प्रदेश प्रमुखको कार्यालयका प्रवक्ता चण्डीप्रसाद अर्यालद्वारा जारी विज्ञप्तिमा उल्लेख गरिएको छ । 

प्रदेश सभामा प्रतिनिधित्व गर्ने कुनै पनि सांसदले आफूसँग बहुमत रहेको आधार प्रस्तुत गरेमा प्रदेश प्रमुखले मुख्यमन्त्री नियुक्त गर्ने व्यवस्था संविधानको धारा १६८ (५) मा छ ।

१६८ (३) बमोजिम अल्पमतको सरकार बनाएका पृथ्वीसुब्बा गुरुङले प्रदेश सभामा विश्वासको मत प्राप्त गर्न नसकेपछि नयाँ सरकार गठनको प्रक्रिया शुरू भएको हो ।

कांग्रेसका कृष्णचन्द्र नेपाली (पोखरेल)ले मुख्यमन्त्रीमा दाबी पेश गर्ने तयारी गरेका छन् ।

६० सदस्यीय प्रदेश सभामा बहुमतका लागि ३१ सांसद चाहिन्छ ।

बिहीवार विश्वासको मतको प्रस्तावको विपक्षमा मतदान गर्ने ३० र स्वतन्त्र सांसद राजीव गुरुङ दीपक मनाङेको समर्थन आफूले पाउने उनको विश्वास छ ।