अमेरिकाको फ्लोरिडास्थित मायामीमा १२ तल्ले आवासीय भवन भत्किँदा बिहीवार एकजनाको मृत्यु भएको छ भने ९९ जना हराइरहेका छन् । 

तर एक वर्षअघि नै उक्त भवन जोखिमको स्थितिमा रहेको भनी प्रतिवेदन बुझाइएको खुलेको छ । 

अधिकारीहरूले यो भवन के कारणले भत्केको हो भन्ने पत्ता लगाइसकेका छैनन् । मायामी–डेइड प्रहरीले अनुसन्धान थालेको छ । मेयर डेनियला लिभाइन कावाले गलत काम गरिएको कुनै प्रमाण फेला नपरेको बताए । 

तर हालैको दिनमा भवनको छतमा गरिएको मर्मतको कामले यसलाई भत्काएको हुन सक्ने देखिएको छ । केही महिनाभित्र भवनको सुरक्षा बलियो बनाउनुपर्ने देखिएको थियो । 

जलवायु परिवर्तनका कारण समुद्रको जलस्तर बढ्दै जाँदा मायामीमा भवनहरू भुइँमा धसिइरहेको पनि वातावारणविद्हरूले बताएका छन् ।