बेलायतमा कोरोना संक्रमण बढ्यो

काठमाडाैं
असोज २८, २०७८

रासस

अ अ अ

बेलायतमा कोरोना भाइरसको संक्रमण पछिल्ला दिनमा झन् बढेको देखिएको छ ।

स्थानीय अधिकारीले बुधवार बेलायतमा मध्य जुलाईपछिकै सबैभन्दा धेरै संक्रमित देखिएको बताएका छन् ।

बेलायतका स्वास्थ्य अधिकारीले पछिल्ला केही दिनमा संक्रमण झन् बढेको पाइएको बताएका हुन् । सरकारी अधिकारीले बताएअनुसार बुधवार २४ घण्टामा पहिलो पटक ४२ हजार जनाभन्दा बढी संक्रमित देखिएका छन् ।

सरकारले अघि सारेका स्वास्थ्य सम्बन्धी कार्यक्रम र अन्य मापदण्ड लगायतका प्रयासका बाबजुत पनि संक्रमित हुनेको दरमा कमी नआएको स्वास्थ्य अधिकारीले जनाएका छन् ।

सरकारी अधिकारीले दिएको पछिल्लो जानकारीअनुसार थप ४२ हजार ६७७ जनामा एकैदिनमा संक्रमण भएको छ ।

यो समेत गरी बेलायतमा अहिलेसम्म संक्रमित हुनेको संख्या ८२ लाख ७२ हजार नाघेको छ । बेलायतको स्वास्थ्य मन्त्रालयद्वारा जारी वक्तव्यमा उल्लेख गरिएअनुसार पछिल्लो २४ घण्टामा कोरोना भाइरसका कारण १३६ जनाको मृत्यु भएको छ ।

बेलायतका स्वास्थ्य अधिकारीले निकै लामो समयपछि यतिधेरै व्यक्तिको एकैदिन मृत्यु भएको बताए । यससँगै बेलायतमा अहिलेसम्म कोरोनाका कारण १ लाख ३८ हजार ८० जनाको मृत्यु भएको छ ।

बेलायतमा कोरोना भाइरसबाट संक्रमित भएकामध्ये करीब ७ हजार जना अझै पनि अस्पतालमै उपचाररत रहेका छन् ।

बेलायतका १६ वर्षमाथिका झण्डै ९० प्रतिशत मानिसले कोरोना भाइरस विरुद्धको खोपको पहिलो मात्रा लगाएका छन् । त्यसैगरी करीब ८२ प्रतिशतले दुवै मात्रा खोप लगाएका पनि स्वास्थ्य मन्त्रालयलको तथ्यांकमा उल्लेख छ ।