सोच्नुहोस् त, होमवर्क नगरेको भन्दै शिक्षकले विद्यार्थी पिटे अभिभावकले के गर्लान् ? हदै भएछ भने शिक्षकमाथि कारवाहीको माग गर्लान् । 

तर, भारतको राजस्थानमा भने अचम्मको घटना घटेको छ । एक व्यक्तिले आफ्नी छोरीलाई शिक्षकले पिटेको भन्दै विद्यालयमा फायरिङ गरेका छन् । 

घटना राजस्थान भरतपुरस्थित एक विद्यालयको हो । होमवर्क नगरेको भन्दै एक शिक्षकले बालिकालाई पिटेका थिए । 

बालिकाले आफ्ना बुबालाई शिक्षकले पिटेको भनेपछि फौजीसमेत रहेका ती व्यक्ति लाइसेन्सवाला बन्दुक लिएर निस्किएका थिए । उनी र स्कुल सञ्चालकका बीचमा विवाद भयो । त्यसपछि उनले फायरिङ गरेका थिए । यसैक्रममा खाना लिएर विद्यालयमा आएकी विद्यालय सञ्चालककी पत्नीलाई गोली लागेको थियो । 

प्रहरीका अनुसार घाइतेलाई अस्पतालमा भर्ना गरिएको छ । फायरिङ गर्ने ती व्यक्तिको खोजी भइरहेको प्रहरीले जनाएको छ । पप्पु गुर्जर नाम गरेका ती फौजी बिदामा घर आएका थिए ।