मोरङको धनपालथान ७ को उखुबारीमा हत्या गरेपछि खाडल खनेर गाडेको अवस्थामा धरान ३ घर भइ भक्तपुरमा बस्दै आएका ४९ वर्षीय राजेन्द्र कुमार श्रेष्ठको शव भेटिएको छ । उनी जग्गाको कारोबारी भएको खुलेको छ ।
उनी मंसिर पहिलो साता घरबाट व्यवहार मिलाउन पूर्व जान्छु भनेर हिँडेको प्रहरीको प्रारम्भिक अनुसन्धानबाट खुलेको छ । उनी भक्तपुरको लोकन्थलीमा बस्ने गरेका थिए । उनको केही बर्ष अगाडि धरानमा सुन व्यापारी समेत रहेको प्रहरीले जनाएको छ । जापानमा ८ वर्ष बिताएर स्वदेश फर्किएर काठमाडौंमा इलेक्ट्रोनिक पसल खोलेका थिए ।

उनले विगत एक वर्षदेखि भने झापामा प्लटिङ गर्ने गरेका थिए । प्रहरीले राजेन्द्रको साथदेखि एनटिसीको सिम कार्ड, पर्स र सवारी चालक प्रमाणपत्र पनि फेला परेको मोरङका प्रहरी प्रमुख एसपी जनार्दन जिसीले जानकारी दिए । सोही ठाउँदेखि १५ मिटर पूर्व उखुबारीमा भेटिएको अर्का एक पुरुषको पहिचान भने खुलेको छैन । बुधबार राति खनाखत हुन नसकेका ती पुरुषको शव भेटिएपछि बिहीबार फेरि श्रेष्ठको  शव पनि भेटिएको हो।   
उखुबारीमा ५ फिट गहिरो खाडल खनेर गाडेको अवस्थामा श्रेष्ठको शव भेटिएको थियो । बिजुलीको पोल गाड्न खने जसरी खाडल खनेर शब गाडिएको पाइएको मोरङ प्रहरीले जनाएको छ ।  घटनास्थल बस्तीबाट करिब ५ सय मिटर टाढा पर्छ ।

एकान्त र उखुबारीको बीचमा शव गाडिएको पाइएको प्रहरीको भनाइ रहेको छ । रातको समयमा शब खाल्डोमा पुरेको हुन सक्ने प्रहरीको अनुमान रहेको छ ।
मृतक श्रेष्ठका  दुई छोरा एक छोरी र श्रीमती रहेका छन् ।

श्रेष्ठको घाँटीमा डोरीले बाँधेको डाम समेत देखिएको छ । उनको हत्या गरेपछि ७ फिट गहिरो खाडल खनेर शव गाडेको अवस्थामा शव फेला परेको प्रहरीले जनाएको छ । शव फेला परेको उखुबारी स्थानीय बरजंगी सिंहको हो ।
 बिहीबार एउटा खाल्डोबाट शव निकालिएको स्थानदेखि करिब ३० मिटर पूर्व गंगाप्रसाद सिंहको उखुबारीमा ३०–३५ वर्षका अर्का एक जना पुरुषको शव बुधबार राती भेटिएको थियो । दुवै शवको प्रकृति एकै खाले तरिकाले खाडल खनेर गाडेको अवस्थामा शव भेटिएको मोरङ प्रहरीका एसपी जिसीले जानकारी दिए ।

उखु काट्ने क्रममा किसानले खनेर पुरेको अवस्थामा खाल्डो भेटाएका थिए । शङ्कास्पद खाल्डो भेटिएपछि प्रहरीलाई खबर गरेपछि प्रहरीले खाल्डो खनेर हेर्दा कपडासहित गाडेको अवस्थामा पुरुषको शव भेटिएको थियो ।
प्रहरीले घटनाको अनुसन्धान सुरु गरेको जनाएको छ ।