गण्डकी प्रदेशका मुख्यमन्त्री कृष्णचन्द्र नेपाली पोखरेलसहितको प्रतिनिधिमण्डलले प्रधानमन्त्री शेरबहादुर देउवासँग सोमवार भेटघाट गरेको छ । 

गण्डकी प्रदेशका मुख्यमन्त्री पोखरेल, अर्थमन्त्री रामजीप्रसाद बराल र भौतिक पूर्वाधार, शहरी विकास तथा यातायात व्यवस्थामन्त्री कुमार खड्कासहितको प्रतिनिधिमण्डलले प्रधानमन्त्री देउवासँग भेट गरेको हो । 

चालू आर्थिक वर्ष २०७८/०७९ को गण्डकी प्रदेश सरकारको बजेटको एजेण्डालाई लिएर प्रधानमन्त्रीसँग भेटघाट गरिएको गण्डकी प्रदेशका मुख्यमन्त्री मुख्यमन्त्री पोखरेलले बताए । 

उनले विगतको सरकारले धेरै आयोजनाहरू बहुवर्षीय ठेक्कामा लगाएको, कतिपय योजनाहरू प्रक्रियामा राखेको तर स्रोत सुनिश्चित नगरेका कारण आफ्नो सरकारमाथि १६ अर्ब भन्दा बढीको दायित्व थपिएकोले त्यसलाई समाधान गर्न प्रधानमन्त्रीसँग भेटघाट गरेको पनि स्पष्ट पारे । 

मुख्यमन्त्री पोखरेलले प्रधानमन्त्री देउवासँगको भेटमा प्रदेशको आर्थिक अवस्था र केन्द्रबाट गरेका अपेक्षाहरू लिखित र औपचारिक रुपमा बुझाएको पनि बताए । 

‘कतिपय कुराहरू ठूलाठूला आयोजनाहरूमा वनसँग गएर कुरा अड्किएको छ । किनभने वनको क्लियरेन्स दिने अधिकार केन्द्रीय सरकारमा छ । त्यस्तै हाम्रो कालीगण्डकी करिडोरमा पर्ने जंगलहरू र त्रिवेणी कोरला भन्ने जुन हाम्रो गण्डकी प्रदेशको लाइफलाइन छ,’ मुख्यमन्त्री पोखरेलले भने, ‘वनका समस्याहरू पनि समाधान गर्ने उद्देश्यका साथ हामी काठमाडौं आएका हौँ ।’

उनले सोमवार नै भूमि व्यवस्था, सहकारी तथा गरिबी निवारणमन्त्री शशी श्रेष्ठलाई भेटेर जग्गा प्राप्तिको कानूनी जटिलताहरूलाई समाधान गरेर अघि बढ्ने कुरामा छलफल भएको पनि बताए ।