ललितपुर महानगरपालिकाले महानगर क्षेत्रभित्रका सात स्थानमा नगर प्रहरी सूचना केन्द्र स्थापना गर्ने भएको छ । मंगलवार ललितपुर महानगरपालिकाका मेयर चिरिबाबु महर्जनले नगर प्रहरी सूचना केन्द्रको उद्घाटन गर्दै ७ ठाउँमा यस्तै खालका सूचना केन्द्र स्थापना गरिने बताएका हुन् । 

कार्यक्रममा बोल्दै मेयर महर्जनले ललितपुर महानगरपालिकालाई स्मार्ट सिटी बनाउनको लागि सूचना केन्द्र पहिलो माध्यम भएको बताए । हेर्दा सानो देखिए पनि यो सूचना केन्द्र अत्यन्तै महत्त्वपूर्ण रहेको उनको भनाइ छ । उनले महानगरपालिकाभित्रको सात स्थानमा यस्तो खालको सूचना केन्द्र स्थापना गरिने जानकारी दिए । 

‘स्मार्ट सिटी बनाउन अत्यन्तै महत्त्वपूर्ण पक्ष सूचना केन्द्र भएकाले यसको स्थापना गरिएको हो,’ उनले भने, ‘यो सूचना केन्द्र सानो देखिए पनि मेयरले गर्ने काम गर्ने जस्तो भएको छ ।’

कुन शीर्षकको राजश्व कति तिर्नुपर्नेलगायतका जानकारी दिने गरी जावलाखेल, लगनखेल, हरिसिद्धि, धापाखेल, नखिपोट, भैँसेपाटी, सानेपामा राखिनेछ । रिङरोडभित्र तीन र रिङरोड बाहिर ४ स्थानमा नगर प्रहरी सूचना केन्द्र राख्ने बताइएको छ । 

त्यस्तै मेयर महर्जनले ललितपुर महानगरपालिका क्षेत्रभित्रका सडकमा ट्राफिक लाइटको समस्या रहेकाले महानगरपालिका भित्रका ६ वटा मुख्य–मुख्य चोकमा ट्राफिक लाइट जडान गर्ने तयारीमा महानगरपालिका रहेको जानकारी दिए । 

‘महानगरपालिकाले जडान गर्न लागिएको ट्राफिक लाइट चानचुने होइन, २१ औँ शताब्दीको नयाँ टेक्नोलोजी हो,’ उनले भने, ‘जावालाखेलमा राख्ने ट्राफिक लाइटले अन्य पाँच वटा ट्राफिक लाइटलाई कन्ट्रोल गर्छ । कुन स्थानमा ट्राफिक जाम भएको छ । लाइटले नै व्यवस्थापन गर्ने गर्छ । यो लाइट जडान गरेपछि चोकमा ट्राफिक प्रहरी बसिराख्नु आवश्यक पर्दैन ।’